Shillong, Naitung 6 : U MLA jongka AITC na ka Mawsynram Constituency u bah H.M Shangpliang u la leit ban ai ka jingkyrshan ïa ka kyrtong President ka NDA ka Droupadi Murmu ha ka jingwan jongka sha Orchid Lake Resort, Umiam Ri Bhoi mynta ka sngi ban pan jingkyrshan na ki MLA bad MP ka jylla.
Wat la u bah Shangpliang um pat mih na ka AITC hynrei ki dak ki shin ki pynpaw ba un sa mih noh namar ha ka jingwan jongu General Secretary ka AITC u Abhishek Banerjee ruh u khlem leit bad mynta ka sngi pat u la pynpaw ba u kyrshan ïa ka Murmu.
Ha kine ki khyndiat sngi la mih ruh ha ki kot khubor ba ki don ki nongïalam jongu kiba kwah ba un ïakhun na ka BJP bad la ïoh jingtip ba ka jingïakren bad jingpynbeit bad ki nongïalam ka BJP ruh ka la ïaid hi. Kane ka jinpynpaw pyrthei jongu mynta ka sngi ka kren shai ba u lah ban pynïasoh noh sha ka BJP ban ïakhun na ka Mawsynram Constituency.
Hynrei haba iakren bad u bah H.M Shangpliang bad kylli hato ka AITC kan kyrshan ïa ka Murmu u la ong “ Ngi dei na ki jylla riewlum bad nga sngew ngi dei ban buh ïa ka politik party shadien. Nga wan shane ym ban leh politik hynrei ban pynpaw ba nga ïadon ryngkat bad ka Draupadi”.
“ Ka la wan ban pan ka jingkyrshan na baroh 60 ngut ki MLA jongka jylla. Ka dei ka longkmie ba nyngkong eh na ki riewlum ban sa kiew sha ka shuki President jongka ri “ ong u bah Shanapliang.
Hynrei ula ong ba ka shong ruh ha ka rai jong ki MLA shimet shimet. Haba kylli balei ba u khlem leit sha ka jingïalang ba wan u General Secretary ka AITC u la ïathuh “ Nga khlem lah ban leit namar ba khlad iba haïing ba jan tam jongnga. Na ka liang jong nga nga la pyntip sha ki nongïalam. U la kyntait ruh ba un pynïasoh sha kiwei ki party da kaba ong “ Nga dang dei u MLA ka AITC”.
