Shillong, Naitung, 06: Ki nonghikai skul SSA na rilum Garo kiba don hapoh ka shatri jong ka All Garo Hills SSA School Teachers’ Association central body (AGHSSASTA) ha ka Lah Sngi u Blei ki la phah da ka jingthoh sha u Myntri Rangbahduh ka ri India u Narendra Modi lyngba u Deputy Commissioner jong ka West Garo Hills ban pyllait noh ïa ka tulop kaba lah sahteng mynta la san bnai kynthih, kata naduh u bnai Rymphang, haduh u Jylliew, 2022.
Ha ka dorkhas, ka Seng ka la pynpaw ïa ki jingeh ba la mad da ki nonghikai skul SSA namar ka jingbym pat ïoh ïa ka tulop kaba la san bnai kynthih.
“Ngi ki nonghikai Samagra ShikshaAbhyan (SSA) jong ka Meghalaya ngim pat ïoh pdiang ïa ka tulop kaba la sahteng la san bnai kynthih naduh u Rymphang, 2022 haduh mynta. La san bnai kynthih ngi la im khlem ka tulop,” ong ka dorkhas ba la soi da u President u L.G Momin.
“Ngi la ïaishah ïa ka jingbym ïoh hok ïa ka tulop naduh ki snem ba la leit noh. Ngi la ïakynduh bad aiti da ki phew tylli ki dorkhas sha u Myntri Rangbah ka Jylla u Conrad K. Sangma bad ha u Myntri ka tnat Pule Puthi u Bah Lahkmen Rymbui hynrei kam shym la don kano kano ka jingseisoh,” ong ka dorkhas na ka Seng.
“Ngim pat ïoh wat ïa ka tulop jong ka Financial Year 2021-22 , kata, jong u bnai Rymphang bad Lber 2022, ïa kaba la dei ban pyllait noh shwa ban poi ka Financial Year 2022-23. Na ka bynta ka Financial Year 2022-23 ka Sorkar Pdeng ka la dei ban pyllait ïa ka pisa sha ka Sorkar Meghalaya namarba ngi la ïa kynduh bun ki jingeh na ka jingbym ïoh tulop,’ ong ka Seng.
Ka Seng ka la pynpaw ruh ba bun na ki nonghikai SSA ha Meghalaya ki la shah ktah ha ka ïoh ka kot, nalor bym don pisa shuh ban siew bai skul ïa ki khun bad ka jingkiewdor ki marbam mardih.
“Ha kum kane ka khep ngi hap ban pyndep ïa la ka kamram da ka kpoh kaba thylli bad ki don ki khep ba ngi hap jaw ummat. Namarkata, ngi kyrpad ïa phi ban pyllait noh ïa ka tulop ha kane ka kynti khlem da pynslem,” la kyrpad ka Seng.
