Shillong, Naitung 06 : Ki MDC jong ka Liang Pyrshah ki la pynpaw ka jingbynñiaw kaba khraw namar ka Council ka mang tang 9 lak tyngka na ka bynta ka tnad Arts & Culture kaba dei na ka bynta ban pynneh pynsah ïa ka riti dustur bad ïa ka kolshor.
“Ka District Council kadei ka jaka ban pynneh pynsah ïa ka riti distur, kumta sngewsih ban ong ban mang tang 9 lak tyngka ban ïarap ïa ki constituency,” ong u MDC ka Congress na Nongstoiñ, Bah Gabriel Wahlang.
Katkum ka jingong jong u, ka Council ka la dei ban mang kham bun namar kadei ka tnad kaba peit ïa ka riti distur bad ka kolshor.
Na ka liang u Executive Member, Bah Victor Ranee haba jubab halor kane ua ong, “Nalor ka jingïarap ïa ki MDC 30 ngut, don ruh ka Khasi Heritage Village ba ka Council ka peit bad shna ruh haduh 11 tylli ki trep jong ki 11 tylli ki Hima ha kaba na ka EC ngi la wan ban jurip dang shen.”
U la pyntip ruh ba ka Hima Mawphlang kan sa pynïaid noh ïa katei ka Khasi Heritage Village khnnag ba ki nongwan jngohkai kin ïoh ban ïohi haba ki wan jngohkai ïa katei ka jaka.
Shuh shuh u la kyntu ruh ïa baroh ki Hima bapher bapher ba lada ki don ki tiar ki tar tynrai ba kin wanrah ban buh ha katei ka ïing trep jong ki Hima.
Haba batai bniah halor katei ka village, utei u EM u la ong ba ka Council ka don ka jingthmu ban ai wai noh ha ki kynhun kiba tbit ha ki tiar tynrai bapher bapher da ka thong ban pynim biang ïa ki jingshad bad ki riam ki beit jong ki Hima bapher bapher.
Halor ka jingkylli ba wanrah da u MDC ka Mawhati Bah Charles Marngar la ka Council ka don neem ki rekod ïa ka jingdon ki jingshad tynrai na ka liang u EM u la ong ba haduh mynta kim.pat don ki rekod hynrei ki don pat ha ka lynti ban pynbeit pynryntih ïa ki riam ki beit tynrai ha ki hima bapher bapher.
“Mynta ngi la shna 11 tylli ki trep jong ki Hima ban buh ïa tiar tynrai jong ki hima bapher bapher bad ban pynshlur lang ïa kiwei ruh ki Hima ki bym.pat leh,” u la ong
Halor kine, na ka liang ki MDC ki kyntu ruh ïa ka Council ba ka la dei ka por ban buh rekod noh ïa ki jingshad tynrai kumjuh ki riam tynrai ha u pud u sam jong ka jylla.
