Shillong, Nohprah 09 : Ka National Highway Demand Committee South West Khasi Hills District (NHDCSWKHD) ka la kynduh ïa u Symbud Myntri Rangbah ka Jylla, Bah Prestone Tynsong ban kyntu ba u dei ban pynneh biang da ka plan kaba rim na bynta ka surok double-lane kaba sdang naduh Mawngap (surok rim NH44E) – Mawphlang – Laitmawsiang – Mawkyrwat – Rangthong – Nongnah – Dirang – Khadphra (Ranikor) Road Project.
Ha ka shithi sha u Symbud Myntri Rangbah, u Chairman ka Committee Bah Kynpham Kharlyngdoh u la pynpaw ka jingbynñiaw halor ka jingtip kaba ki ïoh pdiang ba yn pynhiar noh ïa katei ka projek na ka double-lane highway sha ka intermediate lane.
“Ngi dap da ka jingsngewkhia halor kane ka mynta lada kadei shisha kaba ki thmu ban shim rai namar kane kan ktah ïa ka roi ka pa jong ka thain baroh kawei,” u la ong.
Ka Committee ka la pyntip ruh ba kane ka surok kadei kaba kongsan bha namar ka pynïasoh haduh kumba 1,000 tylli ki shnong ha ki lai tylli ki distrik kynthup naduh ka East Khasi Hills, South West Khasi Hills bad West Khasi Hills. Ki la pynpaw ruh ba kane ka surok ka long kum u budlum na ka bynta ban pynpoi ïa ki mar rep, ka koit ka khiah, ka pule puthi bad khamtam eh ha ka leit ka wan.
Na ka liang ka Committee ka banjur ruh ïa u Symbud Myntri Rangbah ban shimkhia ïa kane ka bynta ban pynïoh biang ïa ka double -lane da kaba ïatrei lang hapdeng ka sorkar jylla, NHIDCL bad ka sorkar pdeng bad ruh ban peit ba ka projek kan ym shah ktah da lei lei ruh.
