Nongpoh, Jylliew 06: Ka jinghap u slap u ba la neh kumba katto katne kynta mynta ka sngi ha ki thaiñ Jorabat, ka la wanrah biang ïa ka jingjia shlei um ha kiba bun tylli ki bynta jong u surok bah National Highway-37, kaba la buh jingeh kaba khraw ïaki paidbah nongleit nongwan lyngba utei u surok.
Kumba la sakhi biang mynta ka sngi, ka thaiñ Joarabat ka la mad biang ïa ka jingjia shlei um bad bun ki paidbah ki la mad jingeh khamtam kiba leit ba wan ha surok ha kaba ka um ka la kiew haduh kumba 3 ne 4 phut shajrong bad bun tylli ki dukan die jingdie ki la shah ktah naka jingshlei um bad tang ki kali heh kiba lah ban ïaid kaba la wanrah ruh ka jingdheng kali ba shipor.
Haba ïakren bad katto katne ngut ki paidbah bad ki nongshong dukan ha katei ka thaiñ kila pynpaw ba ka jingshlei um ha katei ka thaiñ kam dei shuh ka sien ba nyngkong ba ki paidbah ki mad jingeh bad ka jingshlei um ka ju jia naka por shaka por lada jur slap, bad kum ki paidbah kila pynpaw ka jingsngewkhia kaba jur halor kane ka jingeh ba ki mad naka jingshlei um kaba ktah shi katdei ïaka leit ka wan ki paidbah khamtam ki nongshong dukan.
Naka liang kiba bun ki paidbah kila kynnoh ruh ba ka daw ka jingshlei um khah khah ha katei ka thaiñ ka dei namar ka jingbym biang ki nala tuid um ba ka um kam lah ban tuid shaka jaka ba dei ban tuid bad sahkut ha katei ka jaka bad kyrpad ruh sha ki bor ba dei peit ba kin shimkhia ban lait naka jingeh bad ka jingshlei um ba man ka por ha katei ka jaka.
