Ban pynshlur bad ai mynsiem ïa ki samla pule sam u MLA ka Mawkynrew da ka Khusnam

Shillong, Nohprah 08 : Kum ka dak ban pynshlur bad ai mynsiem ïa ki samla pule napoh ka Mawkynrew Constituency u MLA u bah Banteidor Lyngdoh u la sam da ka khunsnam, ka certificate bad ka song pisa sha baroh ki samla pule HSLC bad HSSLC jongka Constituency ha ka Sngi Saitjain ha Jongksha.
Ki la don haduh 40 ngut ei ei ki samla pule napoh ka Constituency kiba la pass bha bad ïoh palat ia ka 75 % shaneng bad kine baroh ki la ïoh ïa kane ka khusnam.
Kane ka dei ka khusnam ba u MLA u ju ai man la u snem sha ki samla pule hapoh ka Constituency kiba pass bha shakhmat bad ka jingthmu hi ka long beit ban ai mynsiem shuh shuh ba kin nang kiew ha ki jingpule jongki sha ki kyrdan ba shalor.
Na ka liang u MLA u la kyntu ïa ki samla pule ba kin shim khia ha ki jingpule jongki khamtam ba ki kmie ki kpa ki la shim khia ban phah skul ïa ki da kaba trei shitom tang ban nang ban stad ki khun. Kumta u MLA u la ong ba haba ki leit pule shabar na ka Constituency ki dei ban kynmaw dyngong ïa ka jingsneng jingkraw ki kmie ki kpa ban long kiba tip sngi ba don akor bad minot ha ki jingpule.