Pan kaiphod ka ïing Bishar halor ka jingpyntrei ïa ka Kad Liengsuiñ Shillong ha Umroi

Shillong, Nohprah 08 : Ka ïing Bishar High Court jong ka jylla ka la bthah ïa ka Sorkar Jylla bad ïa ka Airport Authority of India (AAI) ba kin wanrah ïa ka kaiphod halor ka jingïaid ka kam ba ïadei bad ka jingpyntrei ïa ka Kad Lienhgsuiñ Shillong kaba ha Umroi hapoh ka 11 tarik Nohprah.
“Ngi hukum ïa ka Jylla bad ruh ïa ka Airport Authority of India ba kin ai ïa ka kaiphod ka jingïaid ka kam haduh mynta lyngba ka affidavit ha ka 11/12/2025. Ngi khmih lynti ba ïa baroh ki kam ba donkam ban leh na ka bynta ka jingaiti lane jingïoh ha kti ïa ka jaka ba donkam ha ryngkat bad baroh ki jingbit, la pyndep mynta” ong u Division Bench ba kynthup ïa u Chief Justice Soumen Sen bad Justice W Diengdoh ha ka hukum ba pynmih hadien ba shong bishar ïa ka PIL ha ka sngi Nyngkong.
Ka ïing Bishar kala shimkhia ruh ba la dep shim ïa ki katto katne ki sienjam na ka bynta ban thied ïa ka jaka ba donkam ha kane ka project.
“Hynrei, ka ïing Bishar ka donkam ïa ka jingshai halor ka jingaiti ïa ka jaka ba 11.75 acre ba kam ba la dep ban thied da ka Sorkar Jylla bad ka jingphiah/jingai ïa ka jaka shipai. Ka Ministry of Defence hala ai ïa a Advance Working Permission sha ka Sorkar Jylla ba kan pyndonkam ïa ka jaka shipai, halor ka kyndon ba kin ai bujli ïa ka jaka ba shongdor kumjuh”.
Ka ïing Bishar kala shimkhia ba ka kynhun Myntri kala ai jingbit ban thied ïa ka jaka kaba don ha Umroi Madan, Ri-Bhoi District, na ka bynta ban ïa bujli bad ka jaka shipai ba donkam ban pynheh ïa ka Kad Liengsuiñ.
Ka ïing Bishar kala buh ban shong bishar biang ïa kane ka mukotduma ha ka 11 tarik Nohprah.