Shillong, Nohprah 08: Ki nongïalam ka Jaiñtia National Council (Western Zone) ki la dawa ba dei ban thungkam pura noh ïa ki nongtrei contract kiba la thungkam hapoh ka National Health Mission khamtam ïa kito kiba la ai ka jingshakri ïa palat shiphew snem ha ka thaiñ.
Ïa kane ka jingdawa ka seng ka la buh hakhmat u Mission Director ka National Health Mission (NHM) ka Meghalaya R Chitturi ha ka jingleit ïakynduh ka seng ba la ïalam da u President Hamehi Bamon bad u General Secretary Sambormi Susngi, ba dangshen ïa une u Ophisar.
Na ka liang ka JNC ka la aiti ruh ïa ka dorkhas kaba kyntu ban ai mar katjuh ïa ka jingsiew sha kine ki nongtrei contract, haba ban jur ba ki la trei bad pyndep ïa ki juh ki kam kumba trei ki nongtrei ba pura.
Katkum ka kyrwoh khubor na ka seng la ïathuh ba u R Chittuti ula pynpaw ïa ka jingmynjur bad ki jingkyrpad ka JNC bad kular ban rah ïakren ïa kane ka kam sha ka Sorkar Pdeng. Ula pynpaw ïa ka jingkubur ïa ka nongrim ban siew mar katjuh ïa kajuh ka kam bad ula ïaroh ïa ka jingsngew ba la pyni da ka JNC. La ong ba u ophisar ula kyntu ïa ka JNC ba kan wan beit sha u lada ki don ïa kano kano ka jingeh.
Ha kaba ïadei bad kane, ka seng JNC ka la ïakynduh ruh ïa u Myntri ka Koit ka Khiah Bah Wailadmiki Shylla ha kaba kila ban jur ïa ki juh ki jingdawa ba la pynpaw ha ka dorkhas.
Ka kyrwoh ka ïathuh ba u Myntri u la kular ïa ka seng ba ka Sorkar kan sa shim ïa ki sienjam ki ban pynthikna ba ki nongtrei contract kin ïoh lang ïa kajuh ka jingsiew bad kito ki nongtrei ba pura. Ula pynpaw ruh ba ka Sorkar kan nym phai lyndet ïa kito kiba la aiti la bun snem sha ka NHM bad lada dei ba ka contract jong kine ki nongtrei ka kut noh, ka Sorkar kan sa wad ïa ki lad ban ai kam ïa ki.
