Shillong, Nohprah 08: Hadien ba ladep baroh ki jingïalehkai group stage, ki saw tylli ki kynhun kiba dang sah mynta kin pynkhreh ban ïa aireng ha ka semifinal jong ka SSA Champions Cup katba ki dang beh sha ka thong ban ïoh long ka lahduh kaba nyngkong jong kane ka lympung ïalehkai kaba thymmai.
Ka semi final kaba nyngkong ka ban long mynta ka sngi Ba-ar (09 tarik Nohprah) yn sakhi ïa ka Langsning (lahduh ha ka Shillong Premier League bad kaba bat kyrdan ba nyngkong ha ka Group A) pyrshah ïa ka Nongkseh (lahduh ha ka First Division bad ka runners up ha ka Group B). Kane ka jingïalehkai kan long ha ka por 4:30 baje janmiet ha SSA Stadium-First Ground, Polo.
Ha ka sngi ba bud (lashai ka sngi Balang) yn ïohi ïa ka Shillong Lajong (runners-up ha ka SPL bad kaba wan ba nyngkong ha ka Group B) kan aireng pyrshah ïa ka Meghalaya Police (runners-up ha ka First Division bad kaba bat kyrdan ba ar ha ka Group A) ha kajuh ka por bad ha kajuh ka jaka.
Kumba la ïohi, ki kynhun ïalehkai First Division ki la dep pynpaw ba ki lah ban ïa aireng pyrshah ïa ki klob kiba don ha ka SPL, ha kaba ka MLP ka la ïakhaid bad ka Langsning da 1-1 ha ka group stage, kumjuh ruh ka la long ka jingïalehkai hapdeng ka Nongkseh bad ka Lajong.
Haba phai sha ka semi final kaba nyngkong, ka Langsning ka dei tang ma ka na ki saw tylli ki kynhun ba khlem lah ban rung sha ka semi tad haduh ka jingïalehkai group stage kaba khatduh. Hynrei ha ka por ba ki pynthikna, ha ka sngi Saitjaiñ, ki la leh ha ka rukom kaba shongkun, da kaba jop da 6-0 pyrshah ïa ka Mawkasiang.
Kum ka kynhun, ka Langsning FC ka skhem bha ka defend line ka jong ka, hadien ba ka la shah thep tang shi kol, na ki saw sien ialehkai ba ka la dep, bad ha ka kol, hadien ba u u Rajat Paul Lyngdoh, u la lah ban ialehkai bha, bad na ka bynta ka jingiakhun kaba lashai ka sngi, ka kynhun kan nang kham skhem shuh shuh da ka jinglah ban wanphai ka jong u Atlanson Kharmaw bad Manbhalang Nongmin.
Shakhmat pat u Donlad Diengdoh u pynpaw ia ka mynsiem kaba sliang bad ba thrang bha ka jong u, katno tam lei lei ban lam khmat ia ka kynhun ban thep haduh lai kol (hat-trick) bad ban iarap lang da u Dajiedlang Wanshnong, Nelson Rymbai bad u Wanshwadame Diengdoh.
Hynrei haba phai sha ka Nongkseh SS&CC, ka thaw ia ka rekod kaba kum ka kynhun kaba khlem pat shah rem na ki 13 sien ialehkai ka jong ka ha kane ka samoi ki lympung ialehkai ka SSA, ha kaba sdang shwa da ki 9 tylli ki jingjop ha ka lympung iakhun ka First Division, hadien kane ba kan jop lai sien bad iakhaid shisien ha ka Champion Cup, ha kaba ka jingiakhun kaba dang shu dep pyrshah ïa ka Shillong Lajong ka la kut noh ha ka jingïakhaid kaba mar shi kol.
Kum ka kynhun naduh kaba sdang ka samoi ïalehkai ka jong ka, ka don ïa ki kato katne ki rang ïalehkai kiba long shisha u budlum ne ki shot shan ïa ka kynhun ha kaba ki da aiti shisha met bad mynsiem ïalade bad kine ki long kum u Chesterpaul Lyngdoh bad u Hardy Cliff Nongbri, kiba tehlakam bad pynskhem bha ia ka bynta ba hapdeng, shakhmat pat u Kitboklang Pale bad u Kynsaibor Lhuid, katba ha ka liang ka kamram ban ap ïa ka kol, u Daraphun Talang, wat lada um pat la dei than eh u player ba la san bad rangbah ka jingim ialehkai.
Hynrei u la lah pat ban ïa don lang ryngkat bad ki rang ialehkai dien kum ki jong u Arlangky Nongsiej, Mebankhraw Wahlang bad Banpynkhrawnam Nongkhlaw ban pynskhem ia la ka jong ka kut.
Kumta mano ban jop bad mano ban rem, ka rai hi kan dei lashai hi pat ka sngi, kaba hangne wat u paidbah u long lem u nongiarap ïa la ka kyhnhun ba kin bteng ban jam shakhmat ha kane ka jingïakhun.
