Shillong, Nohprah 7 : U MLA ka Mawkynrew Constituency u bah Banteidor Lyngdoh u la plie paidbah ïa ka Tasa Home Stay kaba ha Jongksha kaba dei jong i Kong Ailibon Khyriem.
Shwa ban ot ribon bad plie ïa kane ka Home Stay na ka liang I Kong Ailibon i la pynpaw ka jingsngewnguh ïa u MLA namar dei lyngba ka jingkdew lynti bad jingïarap jong u ba i la ïoh ia kane ka skhim na ka sorkar ban shna ïa kane ka Home Stay. I la ai khublei ruh ia u Rangbah Shnong namar dei da ka jingïarap jongu ban ai ïa ka NOC bad khlem da don kano kano ka jingpyrshah i la lah ban shna ïa kane ka Home Stay ha kane ka shnong.
Na ka liang u MLA u la ai ka jingkyrkhu kyrdoh ïa i Kong Ailibon khnang ba kane ka jingthrang jongi ban plie ïa kane ka Home Stay kan long ka jingkyrkhu ïa ka shnong bad ka thaiñ hi da kaba ki nongwan jngohkai sha katei ka thaiñ kaba dei kawei na ki jaka ba bun bha ki jaka jngohkai kin ïoh ban sah ha kane ka Home Stay. Namar haba ki sah kin thied jingthied ruh na ki dukan shnong bad kane kan long ka jingkyrkhu ïa ki trai shnong ha kiba bun ki liang.
Na ka liang jongu u la pynpaw ruh kum u MLA uba kwah ban kyntiew bad wanrah ka jingroi jingpar hapoh ka Constituency u kloi ban ïarap da kano kano ka lad ka lynti ban kiew bad ïoh jingmyntoi ki paid ka Constituency. U la pynpaw ba ka thaiñ ka dang donkam bun ki Home Stay bad kaba kham sngewtynnad ruh ba dei ha kane ka shnong ba yn sa tei ïa ka Hotel kaba heh bha da ka sorkar jylla lyngba ka tnad kam jngohkai. U la ong ba ka jingplie ïa kane ka hotel kan sa long ka jingmyntoi ïa ki khun samla ka constituency namar la dep ïakut lypa ba ki kam ki jam lait noh ki kyrdan ba heh hynrei kiba dei hi ïa ki riew paidbah dei ban ïoh beit da ki khun samla napoh ka constituency.
