Shillong, Nohprah 07: Ka seng Samla Katholik Laban Parish hynne ka sngi ka la pynkut ïa ka jingrakhe ïa ka Jubili ksiar.
Ha kane ka sngi ba khraw jong ki Samla la sdang da ka Mass Bakhuid ha kaba u Fr Jameris Shylla u la long u nongkñia ba rangbah ha ka jingdonlang u Parish Priest ka St John’s Parish Laban u Fr Richard Majaw, Fr Paulose Palamattam, Fr Teibok Thongni Assist Parish Priest St John’s Parish Laban.
Haba pharia ïa ka ktien jong u Blei U Fr Jameris Shylla u la ai khublei kyrpang ïa ki Samla ka Parish kiba trei shitom bad pynlong ïa kane ka sngi ba khraw ka jong ki kaba jop.
Kum ki samla phi dei ban pyrto ïa kito ki samla kiba rim kiba la sdang ïa kane ka kynhun bad long kumne kumba ka long mynta, ka jinglem lade bad da kaba seng Nongrim kam shym la long kaba leh nohei namar ngi la ïohi ïa u soh uba bha da ka jingbteng jong ki samla kiba mynta.
“Samla baieid haba ngi wan lum lang mynta ka sngi, ngi pynkynmaw ïa ka phang jong ka jingshakri jong ngi ïa u Nongpynim, kaba pyni ïa ki dak ki shin jong ka jingïaid lynti nangne sha phrang,” u la ong.
U la bynrap da kaba ong aiti lut ïa lade da ka jingsngew rit ha ki ksangti ki jong u Blei, ym da ka mynsiem jingsarong ban ong nga lah hynrei da ka jingïarap lem ka jong u Blei. Ki briew kin klet ïa kaei kaba phi kren, kin klet ïa kaei kaba phi leh hynrei da lei lei kin ym klet kumno phi la ktah ïa ka jingim jong ki ba bun.
U Fr Shylla u la kyntu ïa ki samla ban im ka jingim kaba don jingmut, ban trei barabor da ka jingmut kaba khuid. Ngim ïaroh ïa ki snem kiba la ïaid hynrei ngin ïaroh ïa ki lynti jingim jong ngi ha kine ki snem da kaba noh synniang ha ka rukom pyrkhat pyrdaiñ ka jong ngi.
Ka jingim samla ka long tang shi sien hynrei tang shi sien ka la biang bha lada ngi im ïa ka jingim kaba bha, u Blei u khot ïa phi ban im ka jingim kaba bha, ym don tala khlem u shabit, yn ym don jing shitom khlem ka jingjop shaniah barabor ha u Blei.
Ha ka nohphai sngi jong ka jingrakhe ïa ka Jubili ksiar la wan ban ïa don bynta lang da u Archbishop ka jylla Niam bah Shillong u Most Rev Archbishop Victor Lyngdoh ha kaba u la lam khmat ïa ka jingkyrkhu, hadien ka jingkyrkhu ka la don ka jinglehkmen ïa kane ka snem ba kan sah jingkynmaw da ki jingrwai, ki jingshad bad ki drama na ki kynhun bapher bapher ka Parish. Ha kane la sngi la pyllait ruh ïa ka souvenir da u Fr Jameris Shylla kum ka dak ban sah kynmaw ïa kane ka sngi ba khraw jong ka Seng Samla.
