Khliehriat nohprah 07: U bah Reachingson Siangshai uwei na ki nongwad RTI uba na East Jaiñtia Hills District mynta ka sngi u la leit ban jurip ïa ka jingpynlong exam na ka bynta ka post Medical Officer (Homoeopathy) ba la pynlong ha Jaiñtia Eastern College Khliehriat bad kane ka jingleit jong u ka long ban pyntikna ba ka jingpynlong exam ka District Selection Committee (DSC) ka long kaba ïaid beit ïaid ryntih bad kaba ha ka rukom ba khuid ba suba.
Utei u rangbah u la leit jngoh ha baroh ar tylli ki hall ba pynlong exam bad u la ong ba ïa mynta hi u iohi ba ka rukom pynïaid ïa ka exam ka biang bad u la kyntu ruh ïa ki Invigilators ban nym ai lad ïa ki candidates ba kin leh thok da kano kano ka rukom bad ong ruh ba da lei lei ruh un ym ai lad ïa ka District Selection Committee (DSC) lane ïa ki tnat sorkar ba kin shu leh katba ki mon ha kaba ïadei bad ka thungkam thungjam hapoh ka District.
U la kyntu ruh ïa ki paradoh parasnam kiba napoh ka District, khamtam ïa ki samla kiba applai ïa kino kino ki post ba kin trei shitom bha khnang ba kin lah ban ioh kheit ïa u soh lyngba ka jingtrei shitom jong ki.
