Rah nam lahduh ka R.Shkenshynriah SC haka EJHDFA Super Division 2025
50 hajar synñiang ka Jowai Co-operative Urban Bank Ltd sha ka Association
Khliehriat, Nohprah 06: Ka kynhun ïalehkai jong ka Rymbai Shkenshynriah SC ka ïohrah ïa ka nam lahduh haka lympung ‘Super Division Football Tournament-2025’ da kaba pynliem noh ïaka Sutnga SSCC haka phainal lyngba ka Tie Breaker da 3-1.
ïa kane ka lympung kaba la tip ïaka kum ka ‘5th Kyrmen Shylla Contribution Trophy la pynlong daka East Jaiñtia Hills District Football Association (EJHDFA) ha madan Artificial Turf, Diengshynrum, Khliehriat East Jaiñtia Hills District.
Haba phai sha ka jingïakhun, ym shym la don satia ba lah ban pynïakhlad ïa ka jingïakhaid, ha kaba baroh arliang mamla ki la thep mar 1-1 kol haduh kaba kut jong ka por ba la mang. Ka R.Shkenshynriah ka la ïoh ban lamkhmat dei hadien ka jingbakla jong u Deligent Pdang, uba la kum thep hi (OG) haka minit ba 43, hynrei ha ka khyllipmat jong ki minit pynjlan u Coming Dkhar (90+3’) u la lah ban pynïakhaid na ka bynta ka Sutnga SSCC.
ïa kane ka jingïakhun phainal la wan sakhi lang da u Myntri ka tnad ïalehkai jong ka Sorkar Jylla, u Wailadmiki Shylla, MLA ka thaiñ u Bah Kyrmen Shylla, lem bad kiwei kiwei de ki riew pawkhmat jong ka thaiñ, nangta ki nongkitkam ka EJHDFA nalor ki paidbha kiba la wan ban peitkai.
Ha kaba kut jong ka jingïalehkai u Skillfull Tariang na ka R.Shkenshynriah u la ïoh ban khur ïa ka nam Player of the Match. Kum ka lahduh ka Rymbai Shkenshynriah kala ïoh rong ïa ka khusnam pisa kaba T.1,20,000/- tyngka, katba ka Sutnga SSCC, ka la ïoh T.80,000/- tyngka kum ka runners up.
Kiwei pat ki khusnam ba la sam ha kane ka sngi ki kynthup ïa ka Best Team ba la ïoh khur da ka Shilliang Umshong SC, Best Goalkeeper da u Yoomeki Dkhar na ka Shilliang Umshong SC, Player of the Tournament la ïoh da u Amorrous Lyngdoh na ka Sutnga SSCC, katba ka nam Top Scorer la ïoh da u Ribiang Dkhar naka R. Shkenshynriah, da kaba thep haduh 9 kol ha baroh ki jingïakhun.
Kum ka dak jong ka jingrakhe ‘Golden Jubilee Celebration’ ka Jowai Co-operative Urban Bank Ltd kala synñiang jingïarap haduh Rs.50,000/- tyngka sha ka Association.