Rung Final ka Khimusniang haka WJDSA Super Division
Yn ïaknieh sa ka Demthring SC pyrshah ïaka Ladthadlaboh SC
Jowai, Nohprah 07: Ka kynhun ïalehkai jong ka Khimusniang SC kala ïoh ban rung sha ka Final jong ka lympung ‘Super Division Football Tournament– 2025’ ïa kaba la tip kum ka “17 U Kiang Nangbah Memorial Trophy” bala pynïaid daka West Jaiñtia District Sports Association, (WJDSA).
Kane ka jingïoh rung Final ka long hadien ba kala jop ïaka Demthring SC da 2-1 kol haka jingïakhun Semi Final- 1 Qualifier hynnin ka sngi 05 tarik u Nohprah ha madan Kiang Nangbah Stadium, Dongmihsngi Jowai.
Ïa ki kol naka Khimusiang la thep da u Risan Dkhar haka minit ba 55 bad u Reform Pale haka minit ba 90+1. Ïa ka shikol na ka Demthring la thep da u Nikhil Dkhar haka minit ba 85.
Haba phai pat ha ka jingïakhun Semi Final jong ka 2-Eliminator kaba la long mynta ka sngi 6.12.2025. Ka Ladthadlaboh SC kala lah ban pynliem da 2-0 kol ïa ka Mooknor Thadmuthlong SC, ïa ki kol na ka Ladthadlaboh SC la thep da u Promi Suting haka minit ba 30 bad u Siewdorlang Nongtri haka minit ba 78.
La pyntip ba ka jingïakhun Semi Final jong ka 3-Eliminator kan long haka 9.12.2025 hapdeng ka Demthring SC pyrshah ïa ka LadthadlabohSC haka por 1 baje nohphai sngi. Kiba jop nangne kin ïakhuh Final bad ka Khimusniang SC ban knieh ïa ka nam lahduh jong kane ka lympung haka 13.12.2025.