Pynpaw u Scindia ba ki projek ka Sohra Circuit kin kyntiew bun shah ïa ki kam jngohkai pyrthei
Shillong, Nohprah 04: U Myntri ka Ministry Development of North Eastern Region (DoNER) Jyotiraditya M Scindia ula pynpaw ba ki project ka Sohra Circuit ha Meghalaya bad ka Matabari Circuit ha Tripura kin dei ki project ki ban kyntiew bun bun shah ïa ki kam jngohkai pyrthei ha ka thaiñ Shatei Lam Mihngi haba pyntip ba ïa kine ki project la pyntrei shuwa kum ka jingpyrshang ban pyntreikam ïa kine ki projek.
U Myntri ula pyntip ba ïa u mawnongrim jong ka Sohra Circuit ha Meghalaya lah dei ban buh katba ka Matabari Circuit ha Tripura ka dang ap ïa ka jingmynjur. Ula pyntip ïa kane haba pynïaid ïa ka Consultative Committee jong ka Ministry of DoNER ba long ha ka 3 tarik Nohprah ha Parliament House Annexe.
Nalor ka jingpynkhlaiñ ïa ki jingtei, kine ki tourist circuit project kin pynleit jingmut bha halor ka jingsei ïa ki briew kiba tbit ka sap trei khnang ban pynthikna ïa ka jingdon ki nongtrei kiba tbit ban kyrshan ïa ka jingroi ka kam jngohkai bad ka jingsngewtynnad jong ki nongwankai, ïathuh u Myntri.
Ha shuwa kane, u Scindia ula pdiang ïa ki dkhot jong ka Committee na Lok Sabha bad Rajya Sabha bad ong ba kane ka jingïalang jong ka Committee ka dei ka bynta ba kongsan eh ha ka jingïakren kaba ïai bteng halor ka jingkynshew bad ka roi ka par jong ki Jylla ka thaiñ Shatei Lam Mihngi.
Haba ong ïa ka PM-DevIne (Prime Minister’s Development Initiative for North East Region) kum ka skhim ba kongsan bha jong ka Ministry, u Scindia ula pyntip ba ïa kane ka skhim la pynrung ha ka mang tyngka ka ri ha u snem 2022-23.
U la ïathuh ba kane ka skhim ka don ïa ka mang tyngka ba T.6600 klur na ka bynta u snem 2022-2023 haduh 2025-2026. Kat haduh ka 31 tarik Risaw 2025, haduh 44 tylli ki project ba shongdor T.5,700 klur la dep ban pyllait. Lai tylli na kine ki project ba kot T.176 klur la dep ban pyntrei bad 41 tylli ki project ba kot T.5,500 klur ki dang ïaid shaid shaid. Nalor kane, ki don ruh ki project ba kot T.111 klur kiba la dep ban ai jingmynjur bad ki project ba T.625 klur kiba dang pynkhreh.
U Myntri u la ong ruh ba ki Ophisar na ka DoNER bad ka North Eastern Council (NEC) ruh ki hap ban leit jngoh ïa kine ki project, nalor ka jingshim jingkheiñ da ki kynhun ba lai khnang ban pynthikna ïa ka jingkhuid ha ka jingpyntreikam ïa ki project.