Shillong, Nohprah 04: Ka seng Bharatiya Janata Party (BJP) ha ka sngi palei ka la pynpaw ïa ka jingsngewnguh ïa ka sorkar jylla kaba la pdiang ïa ka jingai jingmut ban wanrah ïa ka jingkylla ha kaba ïadei bad ka eksamin jong ka Meghalaya Public Service Commission (MPSC) kaba kynthup ïa ka jingpynïaid ryntih kumba long ka Union Public Service Commission (UPSC) kaba naduh mynshwa haduh mynta.
Ha ka kyrwoh ba la phah, u Nongaiktien ka BJP u Bah Mariahom Kharkrang ula ong, “Ka Sorkar Jylla ka la mynjur ïa ka jingpynpaw bad jingai jingmut ka BJP Meghalaya ha kaba ïadei bad ka eksamin MPSC, ka rukom pynlong bad ki kyndon kiba la buh kidei ki bynta kiba la pynleit jingmut na ka bynta ban wanrah ïa ka jingkylla”.
La ïathuh ba kane kadei hadien ba la pynmih ïa ka shithi da u Deputy Secretary uba khmih ïa ka Personnel & AR (A) department ha ka 26 tarik u Naiwieng kaba la phah sha u President ka BJP ha kaba la pyntip da kaba ong, “Ki jingai jingmut ki jong phi ban ïaid ryntih bad ki kyndon jong ka UPSC kidei kiba la pdiang. Ïa kane ka mat yn sa khmih bniah bha da ka sorkar kynthup ïa ka jingbiang bad ki bynta kiba lah ban pyntreikam”.
Ka BJP ka la ai jingmut ba ïa ka eksamin MPSC dei ban bud katkum ki rukom leh ka Union Public Service Commission (UPSC), ban ailad ïa ki samla pule ban ïakhun ha ka ‘Preliminary Stage’ hashwa ba kin pyndep ïa ka jingpule Graduation ka jong ki. Kumba long mynta, ki samla pule kidei ban pyndep shwa ïa ka ‘Graduation’ shwa ban aplai ban ïakhun ïa ka eksam Civil Services kaba lam sha ka jingduh ei shi snem ïa kiba bun ki samla kiba la biang ban ïakhun ïa ka eksam.
Ka seng ka la kdew ruh ba ka eksam MPSC kam shym la don satia ïa ka jingbuh tarik lypa, kaba lam sha ka jingbym thikna da ki snem ïa ki samla kiba la lah ban ïakhun ïa ki eksam.
Ha ka kyrwoh la ong, “Ka jingtynruh jong ki nongïalam ka BJP kadei kaba la pdiang mynta da ka sorkar kaba la kular ban khmih bniah ïa katei ka mat, ka jingbit jingbiang ha ka jingpule bad ban khmih bniah ïa ki bynta kiba long kiba lah ban pyntreikam.”
“Ngi pynpaw ïa ka jingsngewnguh bad ai khublei ïa ka sorkar Meghalaya bad ïa u Myntri Rangbah u Conrad Sangma kiba la pdiang ïa ki jingai jingmut kiba kongsan jong ka seng,” ong ka kyrwoh na u Bah Kharkrang.
Lah ban ong ba u President ka BJP u Rikman G Momin ula phah da ka jingthoh sha u Myntri Rangbah ka Jylla u Conrad Sangma ban pynpaw ïa ka jingdonkam ban wanrah ïa ki jingkylla halor kane ka kam.
Ka jingbteng ka seng ban tynruh ba ka MPSC kan treikam ka ban long ryntih bad ka UPSC kadei da ka jingthmu ban wanrah ïa ka jinglong jingman kaba biang bad ïa ka lawei kaba phyrnai na ka bynta ki nongshong shnong ka jylla, ong ka kyrwoh na u Bah Kharkrang.
