Ïoh jingiarap ka Ephatha Society da scooty lai shaka bad ki tiar lyngba ka DMF

Khliehriat, Nohprah 04 : Kawei na ki shlem kaba peit kyrpang ïa kito kiba don jingduna ha ki dkhot met, ka Ephatha Society kaba na East Jaiñtia Hills District, ha ryngkat lang bad ka pyrthei hi baroh kawei hynin ka sngi ka la rakhe ïa ka sngi kyrpang ka International Day of Persons with Disabilities (IDPD) 2025 ïa ka prokram la pynlong ha ka ïing community hall ha Moopala East Jaiñtia Hills District.
Ha kane ka sngi ba kyrpang ka kongsan, ka MLA Sutnga Saipung Constituency kong Santa Mary Shylla, ka Symbud kongsan ka MDC Rymbai Constituency, ka kong Violet Lyngdoh, u Deputy Commissioner u Shivansh Awasthi, IAS, u President of Ephatha Society, East Jaiñtia Hills District, u bah Emlangmi Sapuh, u Waheh Shnong Moopala, u bah Lekijuh Bamon lem bad ki dkhot shnong Moopala ki la sam ïa ki jingai sngewbha sha kito ki briew kiba don jingduna ha ki dkhot met ha kaba la ai sngewbha kawei ka kali lai shaka (Two-Wheeler Handicapped-Friendly Mobility Vehicle),san tylli ki skhuki Wheelchairs, 5 jur ki Auxiliary Crutches, san jur ki Elbow Crutches bad ki jaiñ kup syaid sha ki 78 ngut ki briew kiba don jingduna ha ki dkhot met kiba na ki phra tylli ki shnong kiba na East Jaiñtia Hills District bad kine ki jingai sngewbha ki dei kiba wan lyngba ka skim jong ka District Mineral Foundation (DMF).
Shuh shuh ruh kaba sngewtynnad ban tip ba ka kongsan ka kong Santa Mary Shylla ka ka noh jingiarap T3 lak tyngka kum ka jingiakyrshan lang ïa ka Ephatha Society bad ha kajuh ka por ka la pynbna ruh ïa ka mang tyngka kaba T5 lak tyngka na ka bynta ban shna ïa ka Integrated Farming Centre na ka bynta ki briew kiba don jingduna ha ki dkhot met.
Ka kongsan ka la ai ruh ka jingkhublei kitbok kitrwiang ïa ka Ephatha Society ba kan nang iaid shaphrang ha ka kam ban shakri ïa ki briew kiba don jingduna ha ki dkhot met, ka la ai ruh ka jingiaroh ïa kane ka Society kaba la shim ïa ka synjam ban pynkup bor ïa ki briew kiba don jingduna dkhot met ha kaba kyntiew ïa ki sap ki phong bapher bapher jong ki nongshong shnong ba kyrpang jong ka ri kiba don hapoh ka district ha kajuh ka por ka kongsan ka la ai mynsiem bad pynshlur ïa ki briew kiba don jingduna ha ki dkhot met bad kyntu ruh ïa ki paidbah ba kim dei ban peit ibeiñ hynrei ki dei ban ai mynsiem bad ban iarap ban kyntiew ïa ki.
U Deputy Commissioner, East Jaiñtia Hills District, u Shivansh Awasthi, IAS, u la ong ba ki bor district ruh ki la shim ïa ka jingkutjingmut ban kyntiew ïa ki briew kiba don jingduna ha ki dkhot met bad pyntikna ba kine ruh ki dei ban ioh kajuh ka bhah ha kaba iadei bad ki lad jingiarap ne ki skim kiba wan na ka sorkar, u la ong ba ha kine ki hynriew bnai ba la leit ki bor District ki la shim khia bha ha kaba iadei bad ki lad ai jingiarap da ki skim bapher bapher ba kynthup naduh ki skim kiba wan na ka Chief Minister’s Youth Development Scheme (CMYDS) bad ruh na ka District Mineral Foundation (DMF) ban kyntiew ïa kiba don jingduna ha ki dkhot met kum ha ki jingialehkai sport, ha kaba shna ïa ki jingtei ne infrastructure bad kiwei kiwei ki kam ba bha ban kyntiew ïa ki, u la ong ruh ba ka jingthmu jong ka sorkar bad ki bor district ki long ym ban shu iehnoh ne leh klet ïa ki hynrei ban pyntikna ba kine kiba don jingduna ha ki dkhot met ruh ki dei ban ioh kajuh ka lad ban leh sngewbha kumba long lem kiwei.
U Shivansh Wawasthi, u la ai ka jingiaroh ïa ki kam ba radbah jong ka Ephatha Society bad u la kular ruh ban na ka liang ki bor district ruh kin nang bteng shuh shuh ban ai ka jingiatreilang bad ka Society, u la ong ba un sa pynlong ruh ïa ki prokram ai jingpynshai ne awareness bapher bapher ban pynshai halor ki jait skim bapher bapher kiba wan na ka sorkar pdeng ruh kiba wan lyngba ki Block Level.
Ka MDC jong ka Rymbai-Khliehriat, ka kong Violet Lyngdoh ka la ai ka jingiaroh ïa ka Ephatha Society bad kumjuh ruh ki bor synshar district jong ka East Jaiñtia Hills District kiba na ka por sha ka por ki ju pynkup bor ïa ki briew kiba don jingduna ha ki dkhot met, ka don ka jingkyrmen bad kane ka society kan nang iaid shakhmat ha kane ka jingshakri ba kyrpang bad ka la ai ruh ïa ki kyntien ba ai mynsiem bad pynshlur ïa ki briew kiba don jingduna ha ki dkhot met bad ong ba kiba kum kine ki briew ki don shisha ïa ka sap kaba kyrpang ha ki kumta kim dei ban duh mynsiem, kim dei ban don kano kano ka jingsngew diaw namar ki dei kiba kyrpang bha ha ka imlang ka sahlang ki don ka sap kaba kiwei kiba biang dkhot met kim lah ban sngewthuh ïa kata ka sap ba kyrpang ba ki don ha ki bad halor kane ka la ai da ki khana kiba sngewtynnad bha kiba long kum ka jingai mynsiem ïa ki.
U Shongknor ba pyniaid ïa ka prokram, uba dei u Presidnet jong ka Ephatha Society East Jaiñtia Hills District, u bah E. Sapuh u la pynpaw ka jingsngewnguh bad ai khublei ïa ka Kongsan, ka Symbud Kongsan bad ïa u Deputy Commissioner kiba ju ai ka jingiatreilang bad ka Society bad kiba don ka mynsiem ban kyntiew lem ïa kine ki briew kiba don jingduna ha ki dkhot met, u la iathuh ruh ba kane ka kali lai shaka (Scooty) ka dei kaba nyngkong eh ha ri lum Jaiñtia ba ioh kum kane ka scooty bad kane kan iarap ha kaba leit na kawei ka jaka sha kawei pat ka jaka.
Shuh shuh, u President jong ka Socity u la iathuh ba ki don haduh 420 ngut kiba don jingduna ha ki dkhot met kiba ioh jingiarap na ka Ephatha Society ha kaba ka Society ka iarap ha kaba siew ïa ki bai skul, bai dawai haba pang ba shitom, ka iarap ha kaba pynrung kyrteng ha ka sorkar ba kin dup ioh shuh shuh ki jingiarap na ka sorkar ha kajuh ka por ka iarap ruh ha kaba ai ki jinghikai ïa ki ban kyntiew ïa ki sap ki phong ba ki don.
Kum ban shu bynrap kane ka Ephatha Society kadei ka shlem kaba ju ai ki jingshakri ba radbah ïa ki briew kiba don jingduna ha ki dkhot met, ka don ka ophis treikam ha Mookhu East Jaiñtia Hills District bad hangne ka don ruh ka jaka ba ju ai jinghikai ban suh jaiñ, ban shna tiar bad bun jait ki jinghikai ban kyntiew ïa ki sap ki phong jong ki briew kiba don jingduna ha ki dkhot met bad ruh kane ka Scoeity ka la lah ban phah ïa ki khynnah ban mihkhmat shabar ka jylla kum sha Goa ha kaba iadei bad ka jingialehkai sports.