Dawa ka HYC ïa ka sorkar ban pynshai la kan bishar biang ïa ki nonghikai ba shah buh dak ïong

Shillong, Nohprah 03: Ka Hyñniewtrep Youth Council (HYC) ka la dawa ïa ka sorkar jylla ban bishar ïa ka kyrdan jong ki nonghikai kiba la shah kheiñ kum ki “tainted” ne kiba don dak ïong ha u snem 2008-09 kaba dei ka jinthung kam ïa ki nonghikai lower-primary kaba khlem ïaid beit ïaid ryntih, kaba dei ruh kaba pynbud ïa ka jingshimbishar kaba 4 tarik u Nailur, 2025 da ka High Court kaba la pyndam noh ïa ki jingkheiñ kam runar pyrshah ïa kiba shah kynnoh.
Ka HYC ka kwah ïa ka sorkar ba kan pynshai la ka jingbuh kyrdan “tainted” kan bishar ne wengnoh bad ba kan thung biang ne ba kan pynbiang ka bai lutksan ïa ki riewshimet kiba la shah ktah.
Haka shithi ba la phah sha u Myntri Rangbah u Conrad K Sangma ha ka sngi Balang u President ka HYC u Bah Roykupar Synrem u la ong, “Ngi dawa ïa ka sorkar ba kan pynmih ïa ka jingpynshai kaba wan na ki heh ophisar ba ka jingai kyrdan “tainted” tag la pynjari tang ïa ki katto katne ki nonghikai ne ki kyrtong ha kaba ïadei bad ka thepkam ha u snem 2008-09, hato mynta yn bishar biang ne ban wengnoh halor ka jingbishar ka High Court kaba la pynkutnoh ïa ki briew kiba shah kynnoh, ban bthah ïa ka Education Department ban bishar biang ïa baroh ki “tainted” case kaba la mih naduh ka snem 2008-09 ka jingthungkam bad ban khmih bniah da ka special “Review & Re-instatement Committee” kaba hapoh ka Directorate of School Education & Literacy, ban khmih ïa baroh ki cases da ka por bad ban wanrah ïa ka kyrdan, ka kamai kajih bad ka jingkyrmen ïa ki briew shimet kiba donkam bad kiba la shah pynshitom bakla.”
Ka High Court ka la pynkut noh ïa ka principal accused, da kaba ong ba ka duna ki sakhi, kaba pynpaw ïa ka jingkylli halor ka jingtreikam jong ka kyrdan “tainted”.
Ha ka jingthung kam ïa ki assistant teacher ha u snem 2008-09, na ka bynta ki Lower Primary (LP) school ha Meghalaya la shah ïakhun na kadaw ka jingkynnoh ba kadon ka jingleh bakla ïa ki score-sheet da kaba pyndonkam da ka sia lieh bad kaba shah shilliang.
Haba la sdang ka jingtohkit la pynpaw ba baroh ki kyrteng kiba la shah jied la pynbna kum ki “tainted”. Ha kane ka jingiia ïa ka jingthung kam jong ki la pyndamnoh bad ki la shah wengnoh.
Ha kine snem ba la ïaid kito kiba lashah pynbna ba kim don dak ïong eiei ki la shah thungkam bad ha u snem 2021, kumba 187 ngut ki nonghikai kila ïoh ka lad ban shah thungkam hadien ba la bishar.
“Ha ka 4 tarik u Nailur, 2025, ka Meghalaya High Court ka la pynkutnoh ïa ki kam ba kheiñ kam runar pyrshah ïa ka Myntri ka tnat pule kaba rim bad ïa ki heh ophisar da kaba ong ba kam shym don ka sakhi kaba biang, bad ym don ka record kaba shisha ïa ka kyntien sia lieh, ka jingleh bakla ha ki kot ki sla bad kaba pynpaw ka jingartatien halor ka jingkynnoh ba pyndonkam bakla,” ong u Bah Synrem da kaba byrap,” wat hadien ba la pynkut ïa kane ka kam da ka ïingkashari da kiba la shah kynnoh, kam don pat ka jingshah pynlait ïa ki kyrtong ba shah kynnoh ‘tainted’ kiba la duh noh pat ïa ki kam,” ong u Bah Synrem da kaba bynrap ba haduh mynta kam don ka jingkren kaba shai na ka sorkar.
`”Kane ka jingbuh kyrdan kum ki ‘tainted’ ka ïaid bteng kum ka social stigma, ba pynduh ïa ka kyrdan jong ki, ka kamai kajih,” ong u President ka HYC.