Shillong, Nohprah 03: Ka Mawkasiang bad Mawkriah West ki la leh ïa kaei kaba ki donkam ban leh ban pynsah ïa ka jingkyrmen jong ki ban ïohrung sha ka semifinal ha ka SSA Champions Cup 2025 da kaba jop ïa la ki jong ki jong ki jingïalehkai kiba la long hynne ka sngi Balang (03 tarik Nohprah) ha madan First Ground-SSA Stadium, Polo.
Ka Mawkasiang ka la jop ïa ka Umlyngka da 2-1 kol ha ka Group A, katba ka Mawkriah West ka la wanphai nadien ban pynliem ïa ka Mawlynrei da 4-3 ha ka Group B.
U Samlang Rympei (43’) bad u Lamshai Jana (67’) ki la pynkhihjar na ka bynta ka Mawkasiang ha ka jingïalehkai kaba nyngkong, katba ka shi kol jong ka Umlyngka la thep da u Babitlang Wahlang (52’P) na ka penalty. Kane ka dei ka jingjop kaba nyngkong eh jong ka Mawkasiang, hynrei ka shi poiñ na ka jingïakhun kaba nyngkong, mynta ka la ïoh ban kamai 4 poiñ bad ka dang hap ban aireng pyrshah ïa ka Langsning (7 poiñ). Ka jingjop jong ka Mawkasiang ha katei ka jingïakhun ban wan, kan pynlong ïa ka ban rung sha ka semi final katkum ka rekod jingjop (head-to-head).
Nangta ka jingïalehkai ha ka por janmiet ka la long kaba itynnat bad i hun ban peit, ha kaba u Enestar Malngiang (29’P, 40’, 51’) u la thep ïa ka hat-trick bad u Calbessius Pathaw (38’) u la thep shi kol na ka bynta ka Mawkriah West ban khur ïa ka jingjop. Ka Mawlynrei ka la pynkhihjar lyngba u Ferdinand Pyngrope (17’) bad u Alem Khongwir (67’, 79’).
Kane ka dei ruh ka jingjop ba nyngkong jong ka Mawkriah bad ka la kamai mynta 3 poiñ. Ka nusib jong ki kam don shuh ha ka kti jong ki, hynrei, namar lada ka Nongkseh (6 poiñ) kan ïoh ban khur wat tang shi poiñ mynta ka sngi pyrshah ïa ka Shillong Lajong (9) kan ïohrung sha ka knockout. Hynrei lada shah rem kan rah ïa ka jingïakhun ïaknieh rung semifinal sha ka sngi Saitjaiñ ha kaba ka Nongkseh kan ïakhun pyrshah ïa ka Mawkriah. Kaba sngewtynnad shuh shuh ka long ba ka Laitkyrhong (3) ruh ka lah ban pynkut da 6 poiñ lada ka lah ban pynliem ïa ka Mawlynrei ha ka jingïalehkai ba khatduh jong ka ha ka sngi Thohdieng.
Ki jingïalehkai ka lympung Champions Cup kan dang bteng mynta ka sngi, ha kaba ka Meghalaya Police kan aireng pyrshah ïa ka Mylliem Lum ha ka Group A ha ka por 1 baje nohphai sngi. Ka MLP ka ladep ban pynthikna lypa ïa ka jaka ha ka semi, katba ka Mylliem Lum kan ïalehkai pyndep rukom ha ka jingïakhun ba khatduh.
Hadien kane, ka jingïakhun kaba la khmih lynti bha jong kane ka lympung haduh mynta kan long haba ka Nongkseh kan ïakhun pyrshah ïa ka Lajong ha ka por 4:30 janmiet. Ka SLFC ka la dep ban buh jaka ha ka semi, hynrei ka Nongkseh ka donkam tang ban ïakhaid ban pynthikna ïa ka jaka.
