Shillong, Nohprah 02 : Ka BJP Meghalaya ka la kynthoh tyngeh ïa u President ka Congress Bah Vincent H Pala da kaba ong ba ki jingkynnoh bad ki jingkynthoh jong u ki dei kiba ym don nongrim suda khamtam ban kynnoh ba ka thong ‘One North East’ ka dei ka plan jong ka BJP.
“Na ka liang ka BJP ka la synshar ha ki lai tylli ki jylla ha ka thain shatei lam-mihngi jong ka Ri bad ka la don lang ïa ki nongmihkhmat ha ki ar tylli ki jylla ba kongsan ha ka thain. Kumta kum ka party ngim donkam satia kata ka buit namar ngi jop bad ïoh ban don ha ka bor na ka por sha ka por namar ka jinglah ban synshar bha bad ruh ban wanrah ïa ka roi ka pa bad ka jingkyrshan na ki paidbah lyngba ka politik kaba khuid,” ong ka kyrwoh ba la phah da u nongai ktien ka BJP, Bah MH Kharkrang.
Shuh shuh u ong ruh ban kynnoh ba ka BJP kam ïoh ïa ka jingieid jong ki paid riewlum ha ka thain shatei lam-mihngi jong ka Ri ka dei ka bym lah long. “Ka Congress bad ki dkhot jong ka, ki dei ban wad bha ïa ki jingshisha ha shwa ban pynmih kum kine ki jingkren,” u la bynrap shuh shuh.
