Ka lawei jong ka Manipur ka shong ha ka kti jong phi, ong u Conrad Sangma ïa u Dr. Lorho

Shillong, Nohprah 02 : Ka National People’s Party (NPP) ha ka sngi Baar ka la pdiang bad pynkup burom ïa u President ba thymmai jong ka NPP Manipur, u Dr. Lorho S. Forze ha ka jingïalang kaba long ha NPP Headquarter ha Nongbah Shillong.
Ïa une u Nongïalam ba dei ruh u MP barim ka Lok Sabha na Manipur la pdiang burom da u National President ka Party Conrad K Sangma ba dei ruh u Myntri Rangbah ka Jylla, ki MLA Ka party kynthup ïa ka Kong Ampareen Lyngdoh, Bah Banteidor Lyngdoh, Working President Bah Hamlet Dohling, James K Sangma, Dr. Don War, Bah HM Shangpliang, nalor ki nongïalam jong ka National People’s Youth Front bad National People’s Women’s Front bad kiwei kiwei.
U Conrad haba kren ha ka jingïalang u la ong ba ka jingshimti jong u Dr. Lorho kum u Nongïalam ka party ka dei ha ka por kaba kongsan bha na ka bynta ka Manipur bad ka party hi baroh kawei.
U ong ruh ba ka party ka kmen ba ki ïoh ïa u Nongïalam uba la rangbah, shemphang bad jai jai, ba don ka nongrim, uba trei bad aiti lut na ka bynta ki paidbah ka jylla Manipur.
“Kum ka party ngi sngewkmen ba phi shaniah ha ka party, phi kwah ban trei na ka bynta ki paidbah Manipur bad na ka bynta ka thain shatei lam-mihngi baroh kawei,” u la ong.
U Conrad u ong ruh ba kumba ka long mynta ka sain pyrthei ha Manipur ka shong ha ki kti jong u bad kum u nongïalam na ka bynta ka lawei jong ka Manipur, u hap ban shim ïa ka lyngkor bad ka jingkitkhlieh khnang ba ha u 2027 kin ïoh ban thaw ïa ka sorkar ha u snem 2027.
Haba kren ha kane ka sngi u Dr. Lorho S. Forze u la pynpaw ïa ka jingkmen kaba khraw ba ka party ka bynshet ha u ïa ka lyngkor ban ïalam ïa ka party ha Manipur.
Ha kane kajuh ka janmiet, u National President u la pynkup burom ruh ruh ïa u nongïalam ba dang shu jied thymmai jong ka Legislative Party, u Rameshwar M Singh bad kumjuhruh ïa u Chief Whip, u Loken Singh.
Kiwei pat ki Working President ba dang shu jied thymmai kiba shah pynkup burom lang ki kynthup ïa u Noorul Hasan, MLA bad u Janghemlung Panmei, MLA.