Dang kloi palat ban kren mynta, jubab u Conrad halor ki khubor pynïasoh NPP u Bah Paul

Shillong, Nohprah 02 : U National President ka NPP, Conrad K Sangma um shym la pynpaw shai satia la ka dei neem ka jingshisha kumba phriang ki khubor ba uwei na ki nongïalam ba rangbah jong ka United Democratic Party (UDP), Bah Paul Lyngdoh u thmu ban pynïasoh noh sha ka NPP shwa ka elekshon 2028.
“Ngi dei paralok bha bad ngi ju ïa kren ruh shaphang ka sainpyrthei bad ngi ju ïa kren bad syllok bun bha ki ishu. Hynrei ban kren pat ba un wan pynïasoh noh (sha ka NPP) nga sngew ba ka dang kloi palat ban kren ïa kata,” ong u Conrad haba kren bad ki lad pathai khubor hadien ka jingïalang ha ophis NPP ha kane ka sngi Ba-ar.
Shuh shuh u la ong ruh ba ka por kam pat dei bad kam pat long satia ban ïa kren ïa kine kiei kiei mynta.
Nangta u ong ruh ba kum kine ki ju jia bun ki jingkylla ha ka sainpyrthei la ka long ha kano kano ka party ruh. Tangba u ong pat, ba ïa mynta kin peit shwa bad tad ynda la dei ka por kiei kiei baorh kin sa shai.
Lah ban kdew hangne ba u Bah Paul uba bat ruh kum u Myntri ka tnad Arts & Culture ka sorkar jylla u la shah weng noh na ka shuki Myntri ryngkat bad u Bah Kyrmen Shylla ha ka 16 tarik Nailur mynta u snem. Ha ka jaka jong ki, na ka liang ka UDP ka la thung bujli noh da u President ka party, Bah Metbah Lyngdoh bad u Bah Lahkmen Rymbui, MLA ka Amlarem constituency.