Ka jylla Meghalaya ka dei kaba bun tam ka ram ha ka ri baroh kawei : Pala

Shillong, Nohprah 1 : U Nongïalam ka Congress ha kane ka jylla u ma Vincent H Pala u la kynthoh pyrshah ïa kane ka sorkar MDA ba la ïalam da ka NPP namar ka dei ka sorkar kaba shim bun eh ka ram kaba la kot sha ka 37 % jongka Gross State Domestic Product (GSDP) bad ka dei ka jylla kaba bun eh ka jingshim ram ha ka ri baroh kawei. U la kynnoh ba kane ka jingshim ram palat pud jongka sorkar kan buh ïa ka jylla ha ka jingdap ram kaba shi rynjaiñ.
“ Ka Pisa ba la shim ram da ka sorkar MDA hapoh ka jingïalam ka NPP ka dei kaba heh tam ha ka ri namar ka long haduh 37 % na ka GSDP kaba dei ka jingshimram kaba heh tam ha ka ri” ong u ma Pala namar kat kum ka jingkheiñ kyllum ha ka ri baroh kawei ka jingshim ram ka long kumba 28 % ei ei .
U la kdew ba ka jingïoh lum khajna ka sorkar napoh ka jylla kan long tang 4000 klur bad ka khajna na ka sorkar pdeng ka long kumba 9000 klur bad kane ka la pynlong ia ka sorkar jylla ban shaniah tylli ha ka ram.
U la kynnoh pat ba ka sorkar jylla ka leh klet pat ïa ki tnad ba donkam kyrpang kum ka tnad pule puthi, ka ai kam ai jam hynrei kaba bun ka ram la pyndonkam na ka bynta ka jingmyntoi shimet. “ Kawei kaba la pynlong ïa kane ka sorkar ban pheil lut nadong shadong ka dei ba ym tip shano ki pyndonkam ïa kane ka ram ne ka pisa ba ki shim ram namar katba nang mih ki sngi ki paidbah ki la nang duk nangduk” ong u ma Pala.
Une u nongïalam ka Congress u la maham ba kane ka jingleh ka sorkar kan buh ïa ka jylla ha ka jindap ram da kaba u ong wat u Auditors General bad ka NTII Aayog ruh ki la maham ïa ka sorkar jylla. U la ong “Ka jylla kan sa don hapdeng ki jingeh na kane ka ram bad sa kawei ruh kim ïathuh ïa ki paidbah halor kane”.
U la kyntu ïa ki paidbah ba kin shim khia ïa kane ka jingleh jongka sorkar da kaba u ong kane ka jindap ram ka long shaba palat lada kheiñ kan long 76 hajar tyngka shi khlieh briew.
U la kynnoh ruh ba kane ka sorkar kam lah ban pynmih pisa namar ba la jur ka jinglait tuh ka khajna na kata ka daw ka hap ban shim da ka ram.
“ Ki pyndonkam bun ïa ka pisa ba shim ram ha kaba shna ïa ki surok bad mano ba dei ki kontraktor? Kine ki dei ki briew kiba don ha ka sorkar ba ki dei ruh ki myntri sorkar kiba dei ruh ki kontraktor. Kam shym la don ka jingbhah ïa ka pisa sha ki paidbah na kata ka daw ki paidbah ki la nang duk. Kane ka pisa ba shim kaba la thmu ban shna ïa ki surok kiba neh haduh 10 snem hynrei hangne ha Meghalaya ïa kajuh ka surok hap ban shna pynbha arsien ha ka shisnem bad na kata ka daw sa jur kane ka jingdap ram” pynkut u ma Pala.