Lwet lut ki dieng kwai diengsoh, kdew ki nongïalam shnong ka Riwar Pynursla ha u DyCM

Shillong, Nohprah 01 : Ki nongïalam na ki shnong bapher bapher na ka thain Riwar Pynursla ryngkat bad u Symbud Myntri Rangbah ka Jylla, Bah Prestone Tynsong ki la leit ban peit lang ïa ki jaka rep kiba la julor lut na ka jingpyntwa maw bad khyndew na ka jingpyntrei ïa ka surok Shillong – Dawki kaba don ha ki bynta jong ka Wahkdait kaba hap ha ka Package-5.
“Nga la ïohi da ki khmat lajong. Kumta ba kin ong ba ka twa ngam i dei shuh. Halor kane nga aiti ha i SDO Civil ryngkat bad u BDO ban peit bniah bad ruh ban lum jingkhein ïa ka jingduh kiba ki nongrep ki kynduh,” u la ong da kaba bynrap ba na ka liang ka sorkar ka la dep ban ai ruh ka jingmaham ba kim bit shuh ban pynhap ïa ka khyndew na ki maw sha ki jaka rep jaka riang naba dei ïaid ka surok na ka package-5
Shuh shuh u ong ruh ba teng teng ki kontraktor ba pyntrei ïa ka kam ki kwah ban dep kloi bad ruh ban kham ïohnong na kata ka daw ka jia kumtei.
U Bah Prestone u la ïathuh ruh ba ka kamram kaba ki bynshet mynta ha ka SDO bad BDO mynta ka long ba kin peit bad bishar bniah bad kumjuh ruh ban khein ban diah ïa ka jingjulor kaba la ktah ïa ki nongrep ha kitei ki jaka kiba ki mar rep naduh u kwai tympew bad kiwei kiwei bad khatduh kan ïaid ka jingsiew.
Nalorkane, u Bah Prestone u la ïathuh ruh ba kane ka Monitoring Committee nangne shakhmat kan peit ba ka jingpyntrei kan ym long shuh kaba leh thurmur da kaba kynthup lang ruh naduh ki nongïalam shnong bad ki trai jaka khamtam naduh ki bynta jong kaWahkdait ter ter haduh jingkieng . Ha kane ka committee yn donlang ruh naduh ki nongmihkhmat na ka kompeni kumjuh na ka NHIDCL.
U ong ruh ba ka jingpyntrei nangne shakhmat shwa ban sdang ïa kano kano ka kam kin ïa peit lang, kin ïa pyrkhat lang ba kan ym don shuh ka jingjot jingpra kaba jur.
Ha kane ka jingjurip ki nongïalam shnong ki la pynpaw ruh ha u Bah Prestone ba ka jingjulor ka la long kaba jur haduh katta katta khamtam eh namar mynta kadei ka samoi ba kin kheit ïa u kwai bad tympew na ki lyngkha jong ki.
Ki nongïalam shnong ki pynpaw ruh ïa ka jingkmen kaba khraw halor ka jingpyllait por jong u Symbud Myntri Rangbah ban wan jurip hi dalade ïa katei ka jingjulor kaba la ktah jur ïa ka pliang ja jong ki nongshong shnong na ka daw ka jingpyntrei torti ïa katei ka surok bah Shillong Dawki ha katei ka thain.
Haba kren bad ki lad pathai khubor, uwei na ki Rangbah Shnong, Bah S Pohtam ba dei u Rangbah Shnong ka Pashum u la ong ba ki kmen eh ba ka wan ka surok bah ha ka thain hynrei ki pang pat ka mynsiem haba ki ïohi ba ki bri kwai, bri tympew kiba dei ki lyngkha rep kiba ju kyrshan ïa ka iing ka sem bad ruh ban kyrshan skul ïa ki khun mynta ki la lwet lut ha ki maw bad ka khyndew ba tyllun na ka jingpyntrei ïa katei ka surok.
La donlang ruh ha kane ka sngi naduh ka SDO Civil Kong E Warjri, BDO, ki ophisar na ka PWD, ki nongïalam shnong na bun tylli ki shnong bad kiwei kiwei.