Shillong, Nohprah 01 : Akshaya Kalayatra–2: Poorab ka ba mut ka Thohdur Shiryta na thaiñ Mihngi ka la tyngshaiñ ha ka sorbah Guwahati naduh ka 25 haduh 29 tarik Naiwieng, 2025, ha Don Bosco Institute of Management. La prat lynti da ka Hina Bhatt Art Ventures (HBAV), ban ailad ïa ki barikor na thaiñ mihngi ba kin khajoh sha ki kyrdan ka nam ha ka Ri India da ka ba rakhe ïa ka thohdur ba byllai na ka thaiñ mihngi ka Ri India ban ïa sam lem ha ka dewbah India baroh kawei.
La pynbit pynbiang da ka Hina Bhatt, ka jingtrei thohdur ki barikor ka long ka ba shitrhem bad la pyninam ruh ïa ki shrong ki shrup jong ka thaiñ ka ba la kyrsoi na ki tynrai jong ka riti dustur bapher jong ka thaiñ. Ki barikor ba la ïa shim bynta ki long u Amitabha Sengupta, Buddhi Thapa, Noni Borpozuari, Raphael Warjri, Vijay Mani Thulung, Tamali Dasgupta, Tapati Bhowmik Majumder, Manash Ranjan Jena, Prabin Kumar Nath, Dadul Chaliha, Golmei Gandumpu, Subash Pujahari, Minakshi Buragohain, Guru Kinkar Dhang, Mintu Deka, Lalhming Mawii, Bipin Bihari Martha, Pramod Boruah, Leena Meher, Paltu Ghosh, Kaushlesh Kumar, Rinki Chakraborty, Subhendu Mishra, Bhaskarjyoti Gogoi, and Jackie Bodo.
Kane ka lympung thohdur ka thmu ban pynsuhsieng ïa ki rong ki rup jong ka thaiñ ba kin saphriang kylleng ka Ri India, khnang ba kan long ka lad ka lynti ïa ki barikor na ka thaiñ mihngi ka Ri India ba kin shynna ha ka lyngwiar thohdur jong ka Ri bad ka pyrthei baroh kawei. Ha kane ka lympung la nam kyrpang ïa u Amitabha Sengupta na West Bengal and Raphael Warjri na Meghalaya, lait noh katto katne ki ba la noh synñiang lang ha kane ka lympung thohdur.
U Barikor ka jylla, Bah Raphael Warjri u la thoh dur shaphang kaei ka ba u la shon jingmut na ka jingiphieng jong ka Wah Brahmaputra, ha ba u la nujor ruh bad ka jingjia ba dang shen ka ba khring ïa ki paidbah ha ka imlang sahlang la kum ba tuid ka umbah ha ka wah Brahmaputra. Hynrei u khlem pynkiew skong ïa u kaitor bakhraw, Zubeen Garh bad u la nujor ba ka jingkhraw jong uno uno u briew ym lah ban ïa ryngkat dor bad ka jingkhraw jong ka snap mariang kum ka wahbah Brahmaputra. Kawei pat ka thohdur ka dei halor ka mariang ka ba ker sawdong ïa ka nongbah Guwahati ka ba la nang shah sloit da ki jingtei ki ba heh ha ka sorbah, haduh ba la syrtok ka mariang bad ki bynriew ha ka imlang sahlang.
Ynda ki barikor baroh ki la dep thohdur la pynlang ïa ki dur thoh na ka bynta ban pyninam ha ka 29 tarik Naiwieng, 2025 ha ka ba la wan pynshngaiñ da u Prof. (Dr.) Hari Prasad Agarwal, Professor bad Principal jong ka Royal School of Architecture bad Dean jong ka Royal School of Design, Royal Global University, Guwahati, kynthup ruh katto katne ki kynrem lyndan ba pawkhmat ha nongbah Guwahati.
Ka Akshaya Kalayatra–2: Poorab namarkata kan long u mawpun ban kyntiew ïa ka thohdur na thaiñ mihngi ka Ri India ka ban pynskhem biang ïa ki matti nylla jong ka thaiñ mihngi lyngba ka thohdur ha la ki rong ki rup ba phuh bad ïai suhsieng shiryta.
