La duna ka jingiap ki longkmie ba kha khyllung naduh ba pyntrei ïa ka Mothers Project lap ka IJSRT

Shillong, Naiwieng 29 : Ka jingwad bniah ka la lap ba ka flagship prokram ka Meghalaya-ka MOTHER Project kala wanrah ïa ka jinghiar bun shah ha ka jingiap ki longkmie ha ka por kha khun bad kumjuh ruh ka la kyntiew ïa ka koit ka khiah ki khunlung ha ka Jylla.
Kane ka jingwad bniah bala pynmih ha ka International Journal of Scientific Research and Technology (IJSRT), ka ïathuh ba ka jingiap ki longkmie ha ka por kha khun kala jan kot mar shiteng, ka jingleit kha khun ha ki jaka sumar ka la nang kiew bun shah bad ka jingsumar ïa kiba kha khun kala khlaiñ bha.
Kat kum kane ka jingwad bniah, la kdew ïa hynriew tylli ki jingkdew ba kongsan ha ka koit ka khiah da kaba pyndonkam ïa ki jingkheiñ ba ïoh na ka Sorkar hapdeng u snem 2019 haduh 2024 bad ki jingïakren bad ki frontline worker na ki District bapher bapher.
ïa kane ka jingwad bniah la leh da u Sayandip Gangopadhyay, PhD Scholar, KIIT School of Public Health, KITT University, Bhubaneswar, Odisha lem bad Sudipta Das, Assistant Professor, Department of Public Health, NSHM Business School, Durgapur, West Bengal.
Ka Sorkar Meghalaya kala sdang treikam ïa ka MOTHER Project ha u snem 2019, ka policy kaba ïar bad kaba ïaid kat kum ka National Health Policy, 2017 bad ka Sustainable Development Goals (SDG).
Ka projek ka pynïasoh lang ïa lai tylli ki bynta jong ka koit ka khiah—ka jingïada, ka jingpynkoit, bad ka jingpynlah—lyngba ki jingpynwandur thymmai kum ka MOTHER App (ka jingbuddien ïa ka jingkha khun ha ka por ba dei), Chief Minister’s Safe Motherhood Scheme (CM-SMS) (transportation incentives), bad ki Village Health Councils (VHCs).
Kat kum kane ka jingwad bniah, ka Meghalaya Maternal Mortality Ration (MMR) kala hiar na ka 318 ngut ha u 2021 sha ka 172 ngut ha u 2024, ka jinghiar ba kot haduh 45.9%.
Ki nongwad bniah kila ainam ïa ka jingtreikam bha jong ka MOTHER App, kaba lah ban buddien ïa ki longkmie ba armet ha ka por kaba dei,ka Chief Minister’s Safe Motherhood Scheme (CM-SMS), kaba pynbiang \ïa ki kali ban kit ïa ki longkmie ba suhkha, ka jingjanai ha ka jingpeitngor lyngba ki kor digital bad kiwei kiwei.
Haba phai sha ka jingiap ki Khunlung ba dang kha ne ka Infant Mortality Rate (IMR) ha Jylla, la ïathuh ba ka IMR kala hiar naka 29.9 ha u 2021 sha ka 24.4 ha u 2024, kaba pyni ia ka jinghiar ba 18.7%. Ka jingwad bniah ka ainam ïa ka jingjanai ha ka rukom ai jingsumar ïa ki Khunlung bad ka jingkhlaiñ ka jingai injek ban ïada ïa ki jingpang bapher bapher.