Ka jingdap shyiap ka Wah Myntdu ka ktah ïa ka jingtan um bad ïa ki doh um: K.L Pariat

Jowai, Naiwieng, 30: Ka jingstang palat jong ka Wah Myntdu kaba dei ka nongbsa umbam umdih ïa ka sor Jowai ka la buh jingma ïa ka jingsam umbam ha kine ki sngi ban wan na ka daw ka jingdap u Shyiap bad ka khyndew ha shilynter ka Wah.
Kane ka jingdap shyiap ka la pynstang lut ïa ki thwei ha ki bynta ka Wah Myntdu namar ka jingtheh pathar ïa ka kyndew naduh ka rukom pyntrei surok bad kumjuh na ka jingshna ïa ki ïing ki sem, kaba la buh jingma ïa ki dohum dohwah, kumjuh ïa ki mrad ki mreng bad ka jingitynnad jong ka wah.
Halor kane na ka liang u President ka ‘Khooid Ya ka Wah Myntdu’ (KWM) ma Khroo L. Pariat ula buh ka jingkyntu ïa ki lai tylli ki tnad sorkar kiba dei don bynta ban pynbha pynmiat ïa ka Wah Myntdu kata ïa ka District Council, ka Water Resources bad ka Soil & Water Conservation ba kin khlong ïa u shyiap ha shilynter ka Wah Myntdu kaba long katkum ka dustur jong ki longshwa manshwa.
Lada ym leh kloi ïa kane ka sor Jowai kan shah ktah na ka jingkyrduh umbam haki sngi ban wan namar wat ki bynta jong ka Dam um ha Moopiah kaba dei ka jaka tam um jong ka tnad PHE ruh kan sa dap lut da u syiap bad kylla ktieh ka wah. Kane kan ktah ïa ki kor tan um (Pumping machine) kiba rem dor jong katei ka tnad ki lah ban sniew lut’, ong ma Pariat.
Halor kane ula pynsngew kum ka seng kaba peit ïa ka bha ka miat jong ka Wah Myntdu, ka la dep ban ujor shaduh ka NGT Principal Bench Delhi ban kan peit lem ïa kane ka jingeh kaba lah ban jia ïa ka Myntdu, ula ong ruh ïa ka jingbishar ka NGT kan sa shong biang haka 15 tarik jong une u bnai Nohprah.
Kaba sngewsih shuh shuh u ong mynta ka skim JJM hapoh kane ka District kam shym la treikam pura, kiba bun na ki shnong hapoh ka Jaiñtia Hills ki la shem shitom bad kyrduh umbam umdih, da kaba u ong ki don ki shnong kiba ïoh umbam tang shisngi ha ka shi taïew na ka skim JJM, la pynkut u Ma Pariat.