Palat phew hajar shah ktah ka kamai kajih naduh ba khang ki ïew border haat : MLA Mawsynram

Shillong, Naiwieng 30 : Ka jingkhang khyrdep noh ïa ki iew khappud ne ki border haat ba don ha shi lynter ka India bad Bangladesh khamtam ha Mawsynram constituency ka la ktah palat phew hajar ngut ki nongshong shnong kiba im ja da kaba die ïa ki mar rep bad ki tiar ki tar ha katei ka iew khappud, ong u MLA ka Mawsynram, Bah Olan Suin.
Ha ka jingïakren bad ki lad pathai khubor, u MLA u la ïathuh ba kane ka jingkhang noh ïa ki ar tylli ki iew khappud ha ka thain jong u kadei naduh ba mih ka kynrum kynram bad ka huri hura ha Bangladesh.
“Kane ka iew kaba thnem bha na ka bynta ki paidbah ba sah ha ki shnong khappud ki la khang lut mynta bad kumta ki paidbah kiba imja da kaba leit die ïa ki mar rep bad kiwei kiwei ki jait mar ki la shah ktah tyngeh namar baroh shi katta ki la shaniah ha katei ka iew na ka bynta ban pyndap ïa ka iing ka sem jong ki,” la ïathuh shuh shuh u MLA.
Katkum ka jingïathuh jong u MLA malu mala ki la don kumba 15,000 ngut ki nongshong shnong kiba la shah ktah jur ha ka jingkhang ïa ki ar tylli ki border haat ha katei ka constituency jong u. U la ïathuh ba mynta ki nongshong shnong ki la hap ban wad da kiwei ki lad ki lynti tang ban ïoh pyndap ïa ka iing ka sem.
Halor kane ka bynta, u MLA u la pynpaw ruh ïa ka jingkyrmen ba ynda la kham thanda ka jinglong jingman ha Bangladesh ki khmih lynti ba sa shisien ki sorkar jong baroh ar tylli ki ri kin sa plie biang ïa kine ki iew khappud.