Shillong, Naiwieng 30: Ka kynhun ïalehkai kriket jong ka Meghalaya ka la pynliem noh ïa ka Arunachal Pradesh da 6 wiket ha ka jingïakhun jong ka lympung Syed Mushtaq Ali Trophy 2025-26 plate group kaba la long hynne ka sngi ha Pune.
Ka Arunachal ka la buh ïa ka thong kaba 118 ron ha ki 20 ober bad hap 7 wiket hadien ba ka la jop ïa ka jingkynting pisa (toss) bad shimti ban tied nyngkong. Nangta ka Meghalaya ka la pyndep ban beh ïa ka thong da kaba duh tang saw wiket bad ban pynsah sa 5 over.
Sa shi sien pat u Kishan Lyngdoh u la long u nongïalehkai ba kongsan jong ka kynhun bad khur ruh ïa ka khusnam Player of the Match, da kaba kamai 57 ron khlem da shah pynhap (not out) na ki 42 tylli ki bol, kiba kynthup ïa hynriew tylli ki saw ron (fours) bad ar tylli ki hynriew ron (six). Ha kaba nyngkong, u la ïalehkai kum u nongkyrshan ïa u Arpit Bhatewara uba la kamai 41 ron na ki 28 tylli ki bol (8x4s). Ryngkat lang, kine arngut ki la noh synñiang 62 ron na ka bynta u wiket ba nyngkong.
Shuwa kane, dei tang u Techi Neri uba la lah ban ai ka jingkyrshan kaba thikna na ka bynta ka Arunachal da kaba kamai 32 ron na ki 42 tylli ki bol. Kiwei pat ki nongtied kim shym la lah ban kyntiew eiei namar ba ki nongkawang bol ka Meghalaya kim shym la ailad bad pynhap wiket man ka por, ha kaba ka jingïatreilang kaba heh tam hapdeng ki nongtied ka Arunachal ka long tang 36 na ka bynta u wiket uba lai.
U Swarajeet Das u la wanphai biang da ki jingkheiñ ba bha tam na ka bynta ka Meghalaya ha ka liang ka boling da kaba khur 2 wiket bad shah tied tang 19 ron na ki 3 ober, katba u Agreas Chamcham Sangma u la khur 2/24 na ki 4, u Aaron Nongrum 1/15 na ki 4 ober bad u Akash Choudhary 1/21 na ki 4 ober.
Ka Meghalaya ka don mynta ha ka kyrdan ba-ar ha ka thup kyrdan jong ka plate group da kaba kamai 8 poiñ na ki ar sien ïakhun ba ka la jop, kawei pat ka la wan pyrshah ïa ka Sikkim saw sngi mynshwa. Hapdeng kata ki la shah rem noh ha ka Manipur kaba ïalam hakhmat da 25 ron ha ka sngi Ba-ar.
Ka jingïalehkai ban wan jong ka Meghalaya kan long pyrshah ïa ka Nagaland ha ka sngi Ba-ar.
