SHILLONG, Naiwieng 30: Ka Seng Rangbah Katholik Nongumlong unit ka la pynlong ïaka lympung ïalehkai phutbol ha ka 29 tarik mynta u Naiwieng 2025.
Kane ka jinglehkai ka long kum ka dak ban pynmih pisa naka bynta ka jingrakhe pynkut ïaka Jubilee 25 Snem jong ka Seng Rangbah Katholik Nongumlong kaban sa pynhap pyrda ha u Snem 2026.
La plie pyrda ïa ka jingïalehkai ba nyngkong hapdeng ka 5 Mer bad ka Umlyngka B. Kane ka jingïakhun ka la kut ha kaba ka Umlyngka B ka la khur ïa ka jingjop da 2-1 kol.
Ki kynhun ba ïashim bynta ki kynthup ïa ki Seng Rangbah Katholik naki Balang shnong kiba hap haka Laimer Sub District St.Paul Parish Upper Shillong.
La wan kongsan ha katei ka sngi da u Bah Leonel Nongkhlaw ha ka jingïadon lang ki riew rangbah kiba la shah khot sngewbha naduh ki Nongialam jong ki Seng Kynthei Katholik Nongumlong, ki Nongïalam jong ka Seng Rangbah Katholik Laimer Sub District i Rangbah Balang Jong ka Nongumlong, Rangbah Shnong Nongumlong bad Sacretary jong ka Sport Club Nongumlong.
Haba ai jingkren kum u kongsan, u Bah Nongkhlaw u la ai Mynsiem ïaka Seng Rangbah Katholik Nongumlong da kaba kdew ba kane ka jingpynlehkai ka long kum ka dak ban pynpaw ka jingïaieid kum ki para Rangbah haka Balang Katholik hi baroh kawei.
U Bah Lionel Nongkhlaw u la ai ruh da ka jingïarap daka Song Pisa kum ka dak ban snohkti lang bad ka Seng Rangbah Katholik Nongumlong ha ka jingrakhe ïa ka jubilee kaba sa pynkut noh ha u Snem ban wan.
