Shillong, Naiwieng 29 : U dkhot ka Meghalaya State Planning Board (MSPB) ba dei ruh u MLA ka Mawsynram, Bah Olan Suin u la ong ba ka Board ka pyrshang borbah mynta ban ïakhun na ka bynta ban weng ïa ka dheng kali ha nongbah Shillong.
Haba kren bad ki lad pathai khubo, u Bah Olan Suin u la ïathuh ba ka Board ka la dep phah ruh ka jingai jingmut sha ka sorkar jylla kynthup ïa ki jingtyrwa na ka bynta ban shna ïa ki flyover, da kaba kdew ba kawei na kine ka dei na Polo sha Anjalee na ka bynta ban weng ïa ka dheng kali.
“Ha ka por jong i Bah Metbah Lyngdoh kum u Chairman ka Board, ngi la leit ruh ban jurip katto katne ki jaka kiba shah ktah naka daw ka dheng kali. Ngi la dep ruh ban phah ïa ki jingai jingmut sha ka sorkar jylla halor kane,” u la ong.
Nalorkata, u ong ruh ba ka Board ka dang ïa kren ruh bad ki tnad bapher bapher kynthup ïa ka tnad Police bad Urban Development na ka bynta ban wanrah ïa ki thong treikam ban weng ïa ka dheng kali ha nongbah Shillong.
U Bah Suin u la ai jingmut ruh ba ka New Shillong Township kumjuh ka jingpynkynriah noh ïa ka Secretariat kan ïarap borbah na ka bynta ban pynduna shuh shuh ïa ka dheng kali, khnang ba kane kan ïarap na ka bynta ka jingïaid beit ïaid ryntih ki kali khlem da wit shuh.
“Ki katto katne ki flyover yn buh ha Shillong kum ha Polo, Anjalee ban pynduna ïa ka jingkhapngiah jong ki kali. Ngi khmih lynti ba da ka jingwan jong ka New Shillong Township bad ka jingpynkynriah ïa ka Secretariat sha New Shillong, ka jingkhapngiah kan sa jah hi bad kan plie lad ïa ka ïaid ka ieng jong ki kali kaba khlem shah pynthut shuh,” bynrap biang u Bah Suin.
