Shillong, Naiwieng 29 : U Myntri Rangbah ka Jylla, Conrad K Sangma hynne ka sngi Saitjain u la pyllait paidbah ïa ka Umbrella Post Matric Scholarship jong u snem 2024-25 sha palat 70,000 ngut ki samla pule ka jylla ha ka jingïalang kaba heh kaba long ha District Audotirium, Tura.
Ha kane ka jingïalang la donlang ruh u Myntri ka tnad Pule Puthi, u Lakhmen Rymbui, u Commissioner & Secretary ka tnad u Vijay Kumar Mantri, u Deputy Commissioner ka West Garo Hills, u Vibhor Aggarwal bad ka Director ka tnad Higher & Technical Education ka Hazel D B Sangma.
U Myntri Rangbah haba kren ha kane ka sngi, u la ong, “Ka sorkar mynta ka sngi ka pyllait ïa ka bhah kaba ar bad kaba khatduh jong ka Umbrella Post Matric Scholarship kaba kot sha ka 130 klur tyngka sha kumba 70000 ngut ki samla pule.” U ong ruh ba kane ka sienjam ka long ban pynurlong ïa kaei kaba u Myntri Rangbah u kular shibnai mynshwa ban pyllait noh ïa ka scholarship khlem da ap shuh haduh ban da pyllait ïa ka bhah kaba wan na ka sorkar pdeng.
“Ngi pyllait ïa ka scholarship sha phi na ka pla tyngka lajong namar ba ngim pat ïoh na ka sorkar pdeng”, u la ong bad bynrap ba ka jingpynslem ban pyllait ïa ka scholarship ka dei namar ka jingpynslem ban pyllait ïa ka pisa da ka sorkar pdeng. U la pyntip shuh shuh ba ka sorkar jylla ka la shim ïa kane ka rai ban pyllait noh shwa ïa ka scholarship da kaba buh hakhmat ïa ki jingeh ba ki samla pule ki ïakynduh.
U Myntri Rangbah u la batai ruh ba ka jingpyllait kloi ïa ka scholarship ym lah ban leh kham kloi namar ka rukom ka rukom treikam kaba la don lypa ka ong ba ym lah ban phah lypa ïa ka scholarship sha ki samla pule. “Ngi la dep ban ïakren bad ka Sorkar India ha kaba ïadei bad ka jingeh bad mynta ngi la lah ban pyntreikam bad ngi la lah ban pyllait lypa ïa ka scholarship,” u la ong.
Shuh shuh u la pyntip ruh ba ïa katei ka 130 klur tyngka ki la dep ban pyllait sha ka Meghalaya Rural Bank bad kumta kan shim por katto katne sngi na ka bynta ban pyntreikam bad pynshisha ïa ka account jong ki samla pule shwa ba ki samla pule kin ïoh pdiang ïa ka scholarship ha ki account jong ki. “Kumta ka jingpynshisha ka dei ka kamram jong phi namar phi hap ban pynthikna ba ka bank account jong phi ka don ka jingïadei bad u Aadhaar jong phi”, u la ong ïa ki samla pule.
Shwa kane, u Myntri ka tnad pule puthi, u Bah Lakhmen Rymbui u la ong ba ka dei ka sngi sah jingkynmaw ïa ki samla pule ka jylla kaba pyni ïa ka jingpyndep ïa ki jingkular ba la ai sha ki samla pule. “Ngin sa bteng ban im katkum ki jingkular ba la ai ha ki briew jong ngi ban pynkylla ïa ka pule puthi bad ban pynlong ïa ka kaba lah ban ïoh da baroh,” ong u Myntri.
Ki la don baroh kumba 7,000 ngut ki samla pule kiba la wan ban shim bynta lyngba ka online ha katei ka jingïalang na ki 200 tylli ki jaka jong ka jylla. La donlang ruh ha kane ka sngi naduh ki nongpynïaid jong ki jaka pule, ki nonghikai, ki samla pule nalor ki ophisar ka tnad pule puthi.
