Shillong, Naiwieng 28: U Myntri Rangbah ka jylla u Conrad K Sangma, ha ka sngi Thohdieng u la plie ïa ka surok Paver Block Road kaba hap hapoh ka Smart Town Project kaba ha Lower Hawakhana, Tura ha kaba ïa kane ka jingïalang la pynlong da ka Development Committee, Lower Hawakhana, Tura.
Haba kren ha kane ka jingïalang na ka liang jong u Myntri Rangbah u la ong, ” Nga shim ïa kane ka kabu ban jngoh ïa ka Lower Hawakhana bad nga kmen ban ïoh ïa ka jingkylla mynta ka sngi.”
Na ka liang jong u Myntri Rangbah u la ong ba kane ka skhim kaba kyrpang ka la wanrah ka jingkylla ïa ki paidbah kane ka thaiñ. U la pyntip ruh ba ïa kane ka surok la dep ban mang hapoh ka Smart Town Project na ka bynta ka jingmyntoi jong ki nongshong shnong ha Tura.
U Myntri Rangbah ka jylla u la pyntip ruh ba ka pisa kumba T. 54 klur la mang hapoh ka Smart Town Project na ka bynta ban pyntreikam ïa kane ka surok ha ki shnong bapher bapher jong ka nongbah Tura bad la pyntip ruh ba ka pisa kumba T. 1400 klur la dep ban mang na ka bynta kiba bun ki projek ha nongbah Tura.
“Nga dap da ka jingkmen ban ïoh ïa ka jingkiew jong ka sor Tura bad dei halor kane ba ngi donkam ban mang pisa khambun khnang ban kyntiew ïa ki kam baroh ha kane ka thaiñ,” ong u Myntri Rangbah.
Ha kane ka sngi na ka liang jong u Myntri Rangbah u la ïasyllok bad ki nongshong shnong kiba la pynpaw ïa ki jingeh jong ki ha kaba ïadei bad ki jaka leitbar, ki street light, bad ki CCTV nalor kiwei ki jingdonkam.
