SSA Champions Cup 2025: Thep hat trick biang u Ribor ka Lajong; pynliem ka Laitkyrhong ïa ka Mawkriah West

Shillong, Naiwieng 28: Ka Shillong Lajong ka la pynliem kput ïa ka Mawlynrei haduh 8-0 kol ha ka SSA Champions Cup 2025, kaba la long ha madan First Ground-SSA Stadium, Polo, hynne ka sngi Thohdieng, ha kaba u Riborlang L Lyngkhoi u la ïoh ban thep ïa ka hat-trick kaba arsien lynter jong u ha kane ka lympung.
Hadien kane, kawei pat ka jingïakhun jong ka Group B, ka Laitkyrhong ka la wanphai na ka shi kol ban jop ïa ka Mawkriah West da 5-2 kol.
U Riborlang (37’, 44’, 55’), u Emanbha Marbaniang (13’, 61’), u Deibormame Tongper (65’, 89’) bad u Babysunday Marngar (73’) ki dei ki rangïalehkai kiba la pynkhihjar na ka bynta ka Lajong. Kane kadei kawei pat ka jingjop ba ka Lajong ka la pynpaw ïa ka jingkhlaiñ hadien ba ka la pynliem da 6-0 kol ïa ka Mawkriah ha ka jingïakhun ba nyngkong.
Kumjuh ruh, u Riborlang uba la lah ban thep ïa ka hat trick ha ka jingïalehkai ba nyngkong, u la nang kyntiew ïa ka jingkheiñ sha ka 6 kol ban jam ha khlieh duh ha ka thup ki nongthep kol ba bun tam (top scorer) ha kane ka lympung tad haduh mynta.
Ka Laitkyrhong ka la pynkhihjar lyngba u Wallamsuk Nongkhlaw (24’, 62’), u Learningstar Warlarpih (30’, 84’) bad u Dibinroy Nongspung (54’), katba ka Mawkriah West ka la thep ar tylli ki kol lyngba u Dibarson Kharbudnah (11’) bad u Enestar Malngiang (63’).
Dei lyngba ka free kick kaba itynnad jong u Emanbha ba ka Lajong ka la sdang ïa ka sur jong ka jingjop. Ka Mawlynrei, kaba wan ba-ar ha ka Fourth Division bad kaba dang ïakhun ïa ka jingïalehkai ba nyngkong jong ka ha ka Champions Cup, kam shym la lah satia ban thaw pyrthei, watla ki don san ngut ki nongïalehkai kiba kham tbit na kaba shu shim wai (on loan). Watla katta ruh, ka Mawlynrei ka la pyrkhat ba ka la ïoh pynïakhaid tang hadien san minit hynrei ka kol ka la shah kyntait noh namar ka offside.
Nangta u Ribor u la thep ar tylli ki kol shuwa ban jam sha ka por shongthait ban pynjlan lai shah ïa ka kol lamkhmat na ka bynta ka Lajong shuwa ba un thep ïa ka hat trick hadien shiphew minit ba la ïaid ka kylla miet.
Wat hadien ka kol kaba saw ka Lajong kam shym la sangeh ïa ka jingthombor, ha kaba ka la bynrap sa saw tylli ki kol, ba kynthup ïa ka kol kaba ar jong u Emanbha, ar tylli na u Deibormame bad kawei na u Babysunday.
Ha ka jingïalehkai kaba ar, u Dibarson u la buh hakhmat ïa ka Mawkriah West hynrei ka Laitkyrhong ka la jubab da kaba pynïakhaid bad lamkhmat hi ïa ka jingïakhun tang hapoh shiteng kynta ha ka kylla step lyngba u Wallamsuk bad u Learningstar.
Ka Laitkyrhong ka la nang pynskhem ïa ka jingkyrmen ban jop da kaba thep ar tylli ki kol lyngba u Dibinroy bad u Wallamsuk hynrei u Enestar u la pynphai kawei ban pyni ba ka mynsiem ïakhun jong ka Mawkriah West kam pat lip. Ha kaba kut, u Learningstar u la pynthikna ba ka kynhun kan khur pura ïa ki lai poiñ da kaba thep ïa ka kol kaba san.
Hadien kane ka jingïakhun, ka Lajong ka ïeng ha khlieh duh jong ka Group B da kaba kamai 6 poiñ, katba ka Nongkseh bad Laitkyrhong mar 3 poiñ, nangta ka Mawlynrei bad Mawkriah West da 0 poiñ.
Ha kane ka sngi Saitjaiñ kan don tang kawei ka jingïalehkai ha ka Group A, hapdeng ka Meghalaya Police pyrshah ïa ka Mawkasiang ha ka por 2:30 baje nohphai sngi.