Jowai, Naiwieng 28: Ka Ladthadlaboh ka la ïoh ban khur ïa ka jingjop da kaba suk hadien ba ka la pynliem noh da 3-0 kol ïaka Chutwakhu hynne ka sngi Thohdieng ha kawei na ki jingïalehkai ka lympung ‘Super Division Football Tournament – 2025’.
Kane ka lympung kaba la tip kum ka “17 U Kiang Nangbah Memorial Trophy” la pynïaid da ka West Jaiñtia District Sports Association, (WJDSA) Jowai ha madan Kiang Nangbah, Dongmihsngi.
Haba phai sha ka jingïakhun jong kane ka sngi, ka Ladthadlaboh ka la pynthikna ïa ka jingjop naduh ka kylla step da kaba lamkhmat lai kol lyngba u Bani iman Passah haka minit ba 7 bad u Andrew Nanghuloo haka minit ba 15. Nangta khyndiat minit shuwa ban jam sha ka por shongthait (41’) u Bani iman u la thep biang ïa ka kol kaba ar ïalade bad kaba lai na ka bynta ka kynhun.
