Khlem beh satia ïa kiba tyrwa sha ne tyrwa soh ha Khyndai Lad, pynshai u Dy. CM

Shillong, Naiwieng 27 : U Symbud Myntri ka Jylla ba peit ïa ka tnad Urban Affairs ka sorkar jylla, Bah Sniawbhalang Dhar ha ka sngi Palei u la ong ba mardor u la lum ïa ka jingïalang hynne ka sngi ban wad jingtip halor ka jingphriang ki khubor ba la beh ïa paidbah kiba tyrwa sha, tyrwa kwai, tyrwa soh ne tyrwa kotkhubor ha Khyndailad.
“Mynnin ngi ïoh pdiang ïa ka jingujor na ki nong shong dukan na Hawker’s Market ba ki la don 8 ne 9 ngut kiba sdang ban shong die madan bad kumta mar ïa ïoh ïa ka jingujor mardor hi la pynkynriah noh ïa ki namar katei ka jaka kadei kaba ym shah shuh ban shong die madan,” ong u Symbud Myntri Rangbah haba kren bad ki lad pathai khubor.
Haba pynshai shuh shuh halor ka jingkynnoh ba ki nongtrei Municipal ki beh ïa kiba tyrwa sha, tyrwa kwai bad tyrwa soh ha shi lynter katei ka jaka, na ka liang u Symbud Myntri Rangbah u la ong ba kam shym la long satia kumta, “Balei ngin beh ïa ki, haba ki tyrwa da kaba ïaid artad.”
Lah ban kdew ruh hangne ba halor kane ka jingjia naka liang u President ka VPP Bah Ardent M Basaïawmoit ryngkat kiwei ki nongïalam ki la hiar sha Khyndailad ban kynduh ïa ki paidbah haba ïadei bad kane ka ishu.