Wad lad ka Sorkar ban kyndang ïa kiba sah beaiñ ha Mahadev Khola bad Maxwelton Estate

Shillong, Naiwieng, 27: U Myntri ka Sorkar Jylla uba khmih ïa ka tnad Revenue u Bah Lahkmen Rymbui u la rai ban khot da ka jingïalang ha ka taiew ba ar jong u bnai Nohprah ban wad ïa ki lad ki lynti kumno ban leh na ka bynta ban kyndang ïa ki briew kiba sah be-aiñ ha Maxwelton Estate bad ha Mahadev Khola.
Ïa kane u Bah Rymbui u la pynbna hadien ka jingïakynduh bad ki nongïalam ka Khasi Students Union (KSU) ha ka sngi Palei.
“Nga hap ban khot ïa ka jingïalang jong ka tnad Revenue bad ka Deputy Commissioner (Revenue) ban sngewthuh ïa ka jingshisha kaba pura (jong ka kam). Haba don ka rai kaba kyrshan ïa ka Sorkar ba kane ka jaka (ha Maxwelton Estate) ka dei jong ka Sorkar te balei ka Sorkar kam shimti noh ïa ka bad kumno ban kyndang ïa kine ki briew kiba sah beaiñ,” la ong u Bah Rymbui haba kren sha ki lad pathai khubor.
“Ïa kane ka mat yn sa ïakren sani bha bad yn sa leh ïa kaba donkam bad balei ym shym la leh eiei, ngi hap ban pyntip sha ki paidbah katkum kata,”u la bynrap.
Haba kylli, u Bah Rymbui u la ong ba ka KSU ka la pyntip sha u ba ka kam hapdeng ka Sorkar bad uwei na kiba sah beaiñ ladep ban ïa pynbeit, ha kaba ka Sorkar ka hap ban siew bai lutksan sha u nongdawa.
“Da kaba ong kumta, ki don ruh katto katne kiba sah ha kane ka jaka. Kumta mynta ka mat ban kyndang, kumno ban ïaid bad kaei kaba don hangta (ïa kine baroh yn sa ïa kren ha ka jingïalang),” la ong u Bah Rymbui.
Ha kaba ïadei bad ka mat ha Mahadev Khola, u Myntri u la ong, “ngam da tip eh shaphang kata ka jaka. Kumta, ka mat jong kata ruh yn sa pynrung ha ka jingïalang ka ban long ha ka taiew kaba ar jong u bnai Nohprah ban sngewthuh ïa ka jinglong jingman jong ka jaka bad ïa ki briew kiba sah hangta bad ïa ka lynti kumno ban ïaid shakhmat.”