Khliehriat, Naiwieng, 27: Ki bor synshar jong ka East Jaiñtia Hills District ha ka sngi Palei ki la pynlong ïa ka jingialang ha kaba ïadei bad ka thungkam District Selection Committee (DSC).
Ha ka jingialang la ïa don lang u MLA ka Khliehriat u Bah Kyrmen Shylla, ka MLA jong ka Sutnga-Saipung ka Kong Santa Mary Shylla, ki dkhot jong ka District Selection Committee, ki Principal jong ki skul, ki nongsaid aiñ bad kiwei kiwei kiba na ki tnat bapher bapher.
Ha ka jingialang la ïakren ruh halor ka shithi ba la phah da u Bah R.Siangshai bad u muktiar u Bah Kerlang Ksoo kiba la kdew ïa ki mat bapher bapher ba kynthup ka jingpyni ne display ïa ka cut-off marks, ka Interview ratios bad ka jingdonkam ban don ka jingïakren kaba shai bha bad ki nong thep kam.
Ka Committee ka la rai ban leh ha ka rukom kaba shai haba thep kam lyngba ka DSC da kaba yn pynmih ne publish ïa ka kyrdan , cut-off marks kata hadien ba la dep pynbna ïa ka result bad ruh ban buh ïa ka ratio jong ki nong thep kam ha ka thup na ka bynta ka personal interview bad rai ruh ba ka DSC kan don ka jingiakren kaba shai bad ha ka por kaba biang bad kiba thep kam da kaba email lane da ka SMS.
La rai ba ïa ka Provisional Answer Keys bad ka Final Answer Keys yn upload hapoh ka website jong ka DSC hadien ba la dep pynialeh ïa ka DSC examination, la rai ruh ba ka DSC kan wad ki lad ki lynti ban pynduh ne pyn sangeh (jamming) shi por ïa ki internet, ban buh ïa ki camera CCTV ha ka por pynlong exam khnang ban lait na kano kano ka jingleh bym dei, la rai ruh ba hadien ba la dep ban thep kam ïa ki marks jong baroh ki candidate yn pyni paidbah ha ka official district website.
Ki bor district ki kular ban wanrah ïa ka thungkam thung jam da lynti kaba khuid ba shai, ha kane ka jingialang baroh ki tnat ba ïa don bynta ki la sngew hun ïa kiei kiba mih na kane ka jingialang bad ki la ai ka jingiaroh ïa u Chairman uba la pynlong ïa kane ka jingialang phylliewjingmut bad ki tnat ba don bynta ha kane ka jingialang ki la ai jingmut ba kaba kum kane ka jingialang dei ban pynlong man ka por khnang ban ioh ïa ki jingai jingmut lang bad ban kyntiew ïa ka kam ba bha.
