Shillong, Naitung : U MLA ka Mawlai u Bah P T Sawkmie hynne ka sngi u la sam jingïarap da ka song pisa mar 5000 tyngka sha ki 30 tylli ki Self Help Group (SHG) jong ka shnong Umshing Umjapung bad Mawkynroh.
Ha kane ka juh ka sngi u Bah PT Sawkmie u la ai jingïarap ruh da ki tiar shet tiar tiew ba kynthup ïa ki top syntek bad tyrpal sha ka Seng Longkmie Umshing Umjapung.
Ha ka jingsam ha Umshing Umjapung la don ryngkat u rangbah shnong bah C. S Khongsar, ki nongkitkam shnong, UDP President bah Homer Kharkongor, ki dkhot bad kiwei kiwei ha ka jingïalang ba la pynlong ha Umshing Presbyterian Secondary School.
Katba ha ka jingïasam ha ïing shnong ha Mawkynroh la donlang u secretary shnong bah L. Diengdoh, bah Wanseng Jyrwa, ki dkhot ka UDP bad kiwei.
Haba ai jingkren u Bah PT Sawkmie u la ïathuh sha ki SHG kiba don ha ka jingïalang ïa ka jing sengkam jong kiwei pat ki SHG, khnang ba kin nanglang kumno ban seng ïa ki kam ba kin pynim ïa ka Group ka jong ki.
U ïathuh sha ki ba ki don ki group kiba seng ïa ka kam ban saplai kwai, don kiba shet atta bad ki dohjem bapher ban saplai, shna sabon, don ki group kiba da ka kynhun ki leit ban trei ha ki kam khawai bad kiwei ki jingai jingmut kaba u la pynpaw sha ki ha kane ka sngi.
Ha kane ka sngi u Bah Sawkmie u la pyntip ruh sha ka dorbar shnong Umshing Umjapung ba u la mang 5 lak tyngka kumba u la kular naka bynta ban pynkha ïa ka ïing shnong bad kumjuh ruh ban pynïoh ïa ki dustbin naka bynta ka shnong.
Ha ki ar tylli ki jingïalang la ïoh ruh ïa ka jingkren na bah Homer Kharkongor president ka UDP Mawlai, bah Teibok Kharkongor, bah Wanseng Jyrwa, bah M. N Kharbani, bah Alex Lynser, ki Village organisation bad kiwei kiwei, kiba la pyrto ia ki kam u MLA, kiba kim ju kham iohi ban don u MLA uba kum une uba trei shitom na ka bynta ka thaiñ.
