Shillong, Naiwieng, 26: Ka Sorkar Meghalaya ka la mynjur ïa ka Internal Revenue Generation Scheme na ka bynta ki Engineering College bad ki Polytechnics, kaba ailad ïa kine ki jaka pule ban pyndonkam ïa ka jingstad bad ki jingdon jingem jong ki ban ïoh lum khajna.
“Ngi la mynjur ïa ka Internal Revenue Generation Scheme na ka bynta ki Engineering College bad ki Polytechnic, kaba pynlah ïa ki ban shimti ïa ki projek bad ki kam ba la ai shabar mynshwa sha ki IIT bad IIM,” ong u Myntri Rangbah ka Jylla u Conrad K Sangma haba ïakren bad ki lad pathai khubor hadien ba la wai jingïalang jong ka Kynhun Myntri ha ka sngi Balang.
Ka skhim ka thmu ban pynïasoh ïa ki nonghikai bad ki samla pule ha ki kam kiba lah ban pynmih khajna, da kaba pyndonkam ïa ka jingtbit bad jingtbit jong ki.
“Ki Institute jong ngi, kum ka Shillong Engineering College bad ki Polytechnics, ki don ïa ka bor ban shimti ïa kine ki kam bad kane ka skhim kan ailad ïa ki ban leh ïa kane,” la bynrap biang u Sangma.
Ka Sorkar kan dang pyntreikam ïa ki tnad kiba nabar kum ki IIT bad ki IIM ha kiwei pat ki projek katkum ki jingdonkam.
“Kam dei ba ngin ym pan jingïarap shuh na ki IIT, ka shong ha ki projek. Kumta, katkum ka projek bad ki jingdonkam ngin ai sha ki tnad hynrei kham mynshwa ka Engineering College bad ki Polytechnic kim lah ban shim ïa ka wat lada ki don ka jinglah ban shim ïa ki projek hynrei mynta da kane ka skhim ba la don, kan ailad shuh shuh ïa ki,” la bynrap shuh shuh u Myntri Rangbah.
