Shillong, Naiwieng 26 : Ka Sorkar Jylla ha ka sngi Nyngkong ka la mynjur ban thied shuh ïa ki jaka rep ba don hapoh ka shnong Mawkhanu kaba don ha New Shillong Township ha ka dor kaba 490 tyngka shi phut (sq/ft).
Ïa kane ka rai ka sorkar jylla ka shim ha ka jingïalang jong ka Kynhun Myntri kaba long ha Nan Polok. “Kane ka jaka ba ka sorkar ka thied ka dei ka jaka rep kaba heh 48 akar kaba long trai da ki 17 ngut ki nongrep jong ka shnong Mawkhanu,” ong u Myntri Rangbah ka Jylla, Conrad K Sangma haba kren bad ki lad pathai khubor.
Nangta u la ïathuh ba ïa ka bai jaka kaba ki siew ha ka dor 490 tyngka shi phut kan phah beit sha ka bank account jong kitei ki 17 ngut ki nongrep.
Katkum ka jingïathuh jong u Myntri Rangbah, ha ka por ba ka sorkar ka thied ïa ka jaka ha ki snem ba la dep ha New Shillong ka khlem thied lang ïa ki jaka rep namar kam pat sngew donkam. Hynrei, u la ong pat ba hadien ba ka jingpyntrei ïa ki projek bapher bapher ka la ïaid kumta ki la sngew donkam bad dei na kane ka daw na ka liang ka sorkar ka la ïa kren bad ki nongrep kiba la mynjur ban die ïa ka jaka sha ka sorkar.
U Myntri Rangbah u la ïathuh ruh ba shwa ba ka sorkar kan rai ban thied ïa kine ki jaka rep, ka la thaw da ka committee ban ïa kren bad syllok bad kine ki nongrep.
U ong ruh ba dei hadien ka jingïasyllok, ba ki nongrep ki la mynjur ban die ïa ki jaka rep jong ki sha ka sorkar.
Lah ban kdew hangne ba ka Mawkhanu kadei kawei na ki jaka ha New Shillong ba ka sorkar ka la sdang bad ka thmu ruh ban tei ïa ki projek kam pynroi kiba heh ba heh ha ka jylla khamtam eh haba ïadei bad ki jaka ïalehkai.
