Nongstoiñ, Naiwieng 26: Ka sorkar Meghalaya lyngba ka Meghalaya State Rural Livelihoods Society hapoh ka jingpyntreikam lyngba ka NLRM, ka la ïoh ban pyllait ïa ki kali ban ai sha ki CLF ba kin pyndonkam, ha ka ban pyntyllun kham bha shuh shuh ïa ki kam ki jong ki haba ïadei bad ka kit ka bah ïa ki jingthung jingtep bad kiwei kiwei.
Ha katei ka sngi haduh 5 tylli ki kali la ïoh ban ai sha ka ki Cluster Level Federation (CLF) kiba kynthup ïa ka Dwar Basan CLF, Rympei Baïar, Jingkieng Baskhem bad kiwei kiwei kiba dei hapoh ka scheme Ajeevika Grameen Express Yojana (AGEY).
La ong ba kane ka scheme ka dei ka bai seng ïa ki CLF, pynban kam dei pat ka Grand bad kane ka dei ka jingthmu jong ka sorkar India ban ai sha ki CLF ba kin pyndonkam ha ki jaka kiba jynjar ban ïoh ïa ki kali.
Ïa kitei ki Kali la ïoh ban pyllait paidbah da u bah Methodius Dkhar myntri ka Food Civil Supplies & Consumer Affairs Department, kum u kongsan, ha ryngkat ka jingïadonlang u R.G Momin MLA ka Rambrai Jyrngam Constituency kum u symbud kongsan bad la sakhi lang ruh da u bah R.Kharkongor Block Development Officer ka Mawshynrut bah Shanlang F.Lyngdoh COO Livelihood Promotion MSRLS bad kiwei kiwei.
“Ka sorkar India bad ka sorkar Meghalaya ka phai khmat bha sha ki CLF bad ki SHG bad sha ki Society bapher bapher, ba kin long kum ki shalyntem ban pyntyllun ïa ki kam pynroi ha ka jylla bad ha ka Ri India hi baroh kawei”, ong u Bah Methodios Dkhar, haba kren kum u kongsan ha kawei na kine ki jingïalang hynne ka sngi ha Mawshynrut.
U la ong ruh, “Kane ka jingïoh ïa kine ki kali kan long ka jingmyntoi kaba khraw khamtam haba phi lah ban pyndonkam ban kit jingkit na ki jaka kiba kham jynjar ban ïoh ki kali,bad kane ka dei hi ka jingtrei shitom jong ki SHG bad ki nongtrei jong ka Block”
U la ban jur da kaba ong ruh, “Ka jingïatreilang jong u paidbah ka long kaba donkam, khnang ba ki scheme ne kino kino ki jingïarap ki dei ban poi sha kiba hapoh duh ne ki grass level sha ki kyndong kynshrot jong ki shnong bapher bapher hapoh ka jylla, khnang ba kita kiba donkam shisha ki jingïarap kin ïoh ïa ki jingïarap”.
