Shillong, Naiwieng 26: Ka Nongbah Shillong mynta ka kynti ka la shah jied ban pynlong ïa ka lympung ïakhun jong ka National Football Championship na bynta ka Santosh Trophy 2025-26.
Kane ka jingïakhun ha Shillong kan dei na ka bynta ki kynhun jong ka Group E kaban kynthup ïa ka Meghalaya, Sikkim bad Arunachal Pradesh kaban sdang naduh ka 19 tarik u Nohprah haduh ka 23 tarik jong une u bnai.
Halor kane, na ka liang u President jong ka Meghalaya Football Association (MFA), Bah Hamletson Dohling u la pynpaw ïa ka jingkmen ba ka Jylla ka la shah jied ban pynlong ïa kane ka lympung kaba heh ha ka ri. Ha kajuh ka por u ong ruh ba ki pdiang sngewbha ïa ki jylla kiba donlang ha kane ka Group kiban sa poi shen sha ka jylla ban wan aireng.
Katkum ka prokram, ka Meghlaya kan ïakhun nyngkong ïa ka Sikkim ha ka 19 tarik Nohprah, nangta ka Sikkim kan ïakhun ïa ka Arunachal Pradesh ha ka 21 tarik bud pat sa ka jingïakhun hapdeng ka Meghalaya bad Arunachal ha ka 23 tarik Nohprah.
Ka jaka kan long ha SSA Football Stadium, katba ïa ka por yn sa pynbna kham hadien.
