Shillong, Naiwieng 26: U Kishan Lyngdoh u la lah ban kamai ïa ka spah ron kaba nyngkong jong u ha ka lympung kriket T20 hapoh ka ri ha kaba ka Meghalaya ka la pynliem noh ïa ka Sikkim da 9 ron ha ka jingïalehkai plate group ba sdang jong ki ha ka Syed Mushtaq Ali Trophy 2025-26 ha Pune hynne ka sngi Balang.
Haba la shimti ban tied nyngkong hadien ba ka Sikkim ka la jop ïa ka jingkynting pisa (toss), ka Meghalaya ka la tei ïa ka nongrim kaba skhem da ki 115 ron jong u Kishan bad 63 ron jong u Arpit Bhatewara ban buh ïa ka thong kaba 190 ron bad khyllem 7 wiket ha ki 20 ober. Haba jubab ka Sikkim ka la jan khyndiat ban poi sha ka thong hynrei ka la pyndep da tang 181 ron bad khyllem 4 wiket haduh kaba kut jong ki 20 ober ba la mang.
U Kishan u la tied ar tylli ki spah ron ha ka Ranji Trophy ha ki khyndiat taïew ba la dep bad u la seisoh ban bteng ïa ka jingïalehkai kaba kyrpang ha kane ka rukom lehkai (format) kaba kham lyngkot da kaba kynjoh ïa ka spah ron tang naki 67 tylli ki bol, kiba kynthup ïa 12 tylli ki saw ron (fours) bad hynriew tylli ki hynriew ron (six).
Kymjuh, na ka liang jong u Arpit uba la mad ïa ka jingïalehkai kaba seisoh ha ka Ranji da kaba khyrwit ïa ar tylli ki spah ron, u la donkam tang 41 tylli ki bol ban kamai 63 ron, kaba kynthup ïa san tylli ki saw ron (fours) bad saw tylli ki hynriew ron (six). Ma u lem bad u Kishan ki la nohsynñiang 157 ron na ka bynta u wiket ba nyngkong shuwa ba u Arpit un shah pynhap noh ha ka over kaba 16.
Ka Meghalaya kan jin da la kynjoh tam ïa ka 200 ron hynrei ka jinghap wiket uwei hadien uwei ka la pynlong ïa ka kynhun ban nym kynjoh sha katei ka jingkheiñ ha kaba ka kynhun ka la duna tang 10 ron ban poi sha ka thong kaba 200 ron.
Tang saw tylli ki wiket ki la hap ha ka pali tied jong ka Sikkim hynrei ki la wan ha ki por kiba kongsan. Haba ïanujor bad ka Meghalaya, ym don kawei ruh ka jingïatreilang hapdeng ki nongtied ka Sikkim kiba la lah ban tei ïa ka jingïatreilang kaba bun ron.
U AB Rajera u la kamai 36 ron naki 35 tylli ki bol, u K Sai Satwik u la noh synñiang 23 ron naki 23 tylli ki bol hynrei dei u Kranthi Kumar uba la trei borbah ban wanrah ïa ka jingma, da kaba kamai 66 ron khlem shah pynhap (not out) naki 34 tylli ki bol. Ka jingkyrshan kaba bha khamtam tam ïa u kadei na u Robin Limboo, uba la kamai 35 ron na ki 18 tylli ki bol shuwa ba un shah run out ha u Himan Phukan. Wat la katta ruh, ka jingïatreilang kaba heh tam ka long tang 54 hapdeng u Rajera bad u Satwik.
Ym kum ka Sikkim, ka Meghalaya kam shym la pyndonkam satia ïa kino kino ki nongïalehkai kiba na bar (guest professional player) ha ka Syed Mushtaq Ali Trophy bad kumta ki la don ki lad ïa kiwei pat ki nongïalehkai kriket ban phong ïa ki rong sopti jong ka kynhun. Lai ngut na kine ki nongïalehkai ki la noh synñiang da kaba khur wiket ha ka bol – u Himan (1/22), u Swarajeet Das (1/25) bad u Ram Gurung (1/31).
Ha kaba kut jong ka jingïalehkai u Kishan u la shah jied ban khur ïa ka khusnam Player of the Match bad ka Meghalaya kan wanphai biang sha ka jingïalehkai ban aireng pyrshah ïa ka Manipur ha ka sngi Thohdieng.
