U-23 Women’s T20 Trophy 2025-26: Khur ka Meghalaya ïa ka jingjop ba nyngkong pyrshah ïa ka Manipur

Shillong, Naiwieng 26: Ka kynhun ïalehkai kriket ki kynthei jong ka Meghalaya ka la pynliem noh ïa ka Manipur da 19 ron ha ka jingïalehkai kaba ar jong ki ha ka U-23 Women’s T20 Trophy 2025-26 plate group ha Agartala hynnin ka sngi (Ba-ar).
Haba la pynduna ïa ka jingïalehkai sha ka 9 ober na ka bynta baroh arliang, ka jingïaineh jong ka Suriti Kumari Ray ha ka tied (not out) ban kamai 33 ron na ki 24 tylli ki bol ka la pynlong ïa ka Meghalaya ban buh ïa ka thong kaba 69/5 bad nangta ka la lah ban pynkut noh ïa ka Manipur da tang 50 ron ha ki 8.5 ober.
Ka Suriti ka la thlieh naphang haduh saw tylli ki saw ron (fours) bad ar tylli ki hynriew ron (six) ha ka strike rate kaba 137.50 hadien ba ka Meghalaya ka la rem ïa ka jingkynting pisa (toss) bad shah pynkhamti ban tied nyngkong.
Ka ron kaba heh tam jong ka Manipur ha ka por ba beh ïa ka thong ka la wan lyngba ka Niruta, kaba la lah ban noh synñiang 11 ron shuwa ba kan shah weng noh ha ka Nerisa Nongrum (2/21), kaba la pynkhyllem ruh ïa ka Barkatun tang na bynta 9 ron. Ka Sara D Kharbani (1/5) ka la pynhap noh ïa ka Kebriya, khlem da ailad ban kamai ron.
Nalor kine, ki hynñiew tylli ki wiket kiba dang sah baroh ki la shah weng lyngba ka run out namar ka jingpyrshang jong ka Manipur ban wad ïa ki ron kiba donkam. Tang ka Indariakor Kharwanniang marwei ka la ïoh ban khur haduh lai wiket na ka run out, katba ka Ritreki Pohshna, ka Janika Marak, ka Abiezer Kharsyiem bad ka Suriti ki la weng ïa ki wiket da mar kawei ka run out.
Ka Meghalaya ka la mad ïa ka jingshah rem ha ka jingïakhun ba nyngkong pyrshah ïa ka Pondicherry da 140 ron ha ka sngi Nyngkong hynrei kane ka jingjop pyrshah ïa ka Manipur ka dei ka resol kaba ka kynhun ka lah ban tei ha ka jingpyrshang ban ïaid shakhmat. Ka jingïalehkai T20 kaba lai jong ka Meghalaya kan long pyrshah ïa ka Arunachal Pradesh ha Agartala ha ka sngi Palei.