Rev. Zambolis M. Sawkmie
Nga thoh ïa kane ym namar ba nga isih ïa ka Balang Presbyterian, hynrei, namar ka jingsngew-kitkhlieh ïa la ka balang bad na ka bynta ki mynsiem kiba kordor. Ngam ïohlad shuh ban kren bad pynsngew hapoh ka dorbar jong ka Synod namar naduh ka Dorbar Synod kaba la long ha ka Balang Presbyterian Sakwang ha u Lber jong kane ka snem 2025, ka Synod ka la shim ïa ka rai bakhlaiñ ban mynjur ïa ka recommendation jong ka EC jong ka, ban weng noh ïa nga na ka thup kyrteng ki pastor ka KJP Synod Sepngi namar ba ngam treh ban soi ïa ka Bond Agreement kaba long pyrshah ïa ka Riti Pynïaid Balang ka Balang Presbyterian ha Ri India, bad ruh kaba ñiewbeiñ ïa ka jingïaseng pynkyntang phadri. Nga la pdiang hun mynsiem ïa kaei kaba kane ka bor balang ka lah rai bad ka jubanlak ba nga la khlei ha ka dorbar ka ïeng skhem.
Nga la dang pyrkhat ba yn ym don ei ei shuh ban ïakren ïa ki kam bajwat bad ba ka kam balang kan ïaid shaphrang ha kaba saiñdur bad tei mynsiem. Hynrei, ki jingjia kiba sawa bad kiba don ki sabut baskhem ki kdew ïa ka jingishongpher bad ka jingthom bor kaba wat lada yn pynduh ja bad pynïap ïa ka longïing longsem u para shakri ha ka kam U Kynrad ruh i kumba ka biang. Balei haduh katne katne ka wan jia hapoh ka jylli jong kiba ngeit ha U Jisu Khrist? Ka syrngiew jingdum ka wan tyllep lei haduh katne katne hapdeng ki sngi kiba jwat eh ban ïatei mynsiem!
Dang ha kine ki khyndiat sngi don ba phah sha nga ïa ka shithi na ka Synod shaphang ka Special Session ka ban sa long ha ka 27 tarik Naiwieng 2025 ha ka Balang Presbyterian Mawlai. Nga da kyndit thred kumba ïuh tdong bseiñ haba pule ïa ka. Ka dei ka shithi kaba don ka Reference Number: KJPSS/EC/2024-2027/135 dated 13 th November 2025, ba la soi da U Senior Executive Secretary. Ka phang jong kane ka Special Session ka long “ban iakren ia ka kam ba wan na ka Executive Committee kaba dei bad ka jingpynkhein bad jingbym kohnguh shuh jong uwei napdeng ki pastor ka Synod ïa ki Rai bad rukom treikam ka Synod.” Hato na ka bynta kane, da donkam kyrkieh ban da pynlong da ka Special Session?
Balei ym lah shuh ban ap ïa ka dorbar Synod? Nga la pyrshang ban khmih ïa ki Synod Report haduh ka Report bad ki Kam kiba la ïakren ha ka Dorbar Synod kaba lah long ha Sakwang.
Nga shem ba hadien ba ka Synod ka lah rai kumto ïa nga, ba dei sa tang u Rev. M. Pyngrope, u pastor ba trei ha ka Balang Presbyterian Mawkhar. Kumta kumta hi, nga la ïakren bad une u pastor bad nga la ïoh katto katne ki jingtip kiba la kyrshan da ki sabut. Dei halor jong kine nga angnud ban kdew ba imat ha ka kam balang, ka la don ka jingsakma ka jingïaid lynti shabar ïa ka Riti Pynïaid Balang ka Balang Presbyterian ha Ri India. Kine harum ki long ki jingshisha kiba la pynskhem da ki sabut:
1. Ka KJP Synod Sepngi ha ka Synod 2022 ka lah pdiang ïa ka Bond Agreement kaba khlem don kano kano ka jingïatai kaba sani bha. Lah ban shem ha ka Annexure X, sla 147-148 jong ka Synod Report 2022. Ka number 4 jong kane ka bond ka don ki kyntien “I signed this bond in the presence of the Moderator, the Secretary of the Khasi Jaiñita Presbyterian Synod Sepngi, without coercion from anybody but in sound mind and health.” La thoh ïa kane ka bond ha ka ktien English bad ha ki kyntien ki nongïasaid aiñ kaba shem shitom ïa kiba bun ki pastor ban sngewthuh. Nalor ba la don ki kyntien without coercion, ka EC jong ka Synod ka pynbor ïa ki pastor wat ïa kiba la shong thait ruh ban sign.
2. Dei ka jingbymsign ïa kane ka Bond kaba la pynsdien ïa u tyllai phasi ïa u Rev. M. Pyngrope kumba ka la long ïa nga. Nga te ngam shym sign namar ngam shai ïa ka, bad ba ka long pyrshah ïa ka nongrim jong ka Riti Pynïaid Balang ka Balang Presbyterian ha Ri India. Ïa nga lah weng na ka list ki pastor ka Synod Sepngi kumba la kdew haneng, hynrei, ïa une u pastor tang hadien ha dorbar Synod kaba la long ha Sakwang, ka EC jong ka Synod ka la shim rai kumba leh ha ïing bishar da kaba ai da ka SHOW CAUSE NOTICE lyngba ka shithi No. EC/2024-2027/83 dated 15 th April 2025 da kaba buh ïa ki kyntien “…phim shym la pynkohnguh ia lade ban soi ïa ka Bong Agreement bad balei phi ialeh pyrshah ïa ka rai jong ka Synod.” La don ruh ki kyntien ha katei ka shithi, “…kane ka jingleh jong phi ka pyni ba phi ialeh pyrshah ia ka bor kaba thung (ordain) iaphi kum u pastor.” Une u pastor u la jubab ïa ka show cause notice, bad kumba ka la long ha ka case kaba kham katto katne snem mynshuwa ha kaba dei bad uwei na ki pastor ka Synod, la ïohi ïa kijuh ki kyntien ba pyndonkam “BA YM LAH BAN PDIANG ÏA KA JINGTHOH JONG PHI ….” Kumta halor jong kane, ka EC ka la shim ïa ka rai ban suspend ïa une u pastor lyngba ka shithi No. KJPSS/EC/2024-2027/96 dated 10 th June 2025. Hato tang bym soi ïa ka Bond hap ban suspend? Ki kyntien Without Coercion hato kim mut ba lah ban ym sign ruh haba kam shai khlem da pynkheiñ ïa ka Riti Pynïaid Balang ka Balang Presbyterian ha Ri India?
3. Ha kajuh ka sngi, ka EC ka la pynkhreh ïa ka CIVIL MISCELLANEOUS APPLICATION sha ka HIGH COURT OF MEGHALAYA bad la phah ïa kata ka CAVEAT pyrshah ïa u Rev. M. Pyngrope, kaba ngi ki bym pule Law ngim lah ban sngewthuh. Nga kdew hangne ym ban ïaleh mokotduma lymne pyrshah ïa kata ka jingleh ha ka jingstad ka EC jong ka Synod.
Hynrei, kum u pastor nga kylli ïa phi ki dkhot ka EC kiba ju shim pyrkhat ïa ki kam ka Synod bad kiba sngewthuh kham bha ruh ïa ka Riti Pynïaid Balang ka Balang Presbyterian ha Ri India: Mynno u Rev. M. Pyngrope u leit ban mudui ïa ka jingleh ka Synod sha ka Ïingshari?
Balei ba ka EC ka leh ïa kane? Kat kum ka Riti Pynïaid Balang ka Balang Presbyterian ha Ri India, ha ka latest edition la don kine ki kyntien ha ka Lynnong 5, bynta 4 bad ka sla 95:
Ka jingmana ban leit ujor sha ka ïingbishar (civil court): La mana ïa uno uno u Minister ba la pynkyntang lane u Tymmen Basan ba la pynkyntang ban leit sha ka Ïingbishar (Civil Court) ban ujor pyrshah ïa ka rai jong kano kano ka Bor Balang (Church Court).
Kitei ki kyntien kiba don ha ka Riti Pynïaid Balang ka Balang Presbyterian ha Ri India ki shai kdar, te balei ba ka EC jong ka Synod ka leit sha ka Civil Court ha kaba dei bad u Rev. M. Pyngrope? Kin mih tang ki jingkylli bad ki jubab kiba thylli da ki jingantad suda.
4. Halor kitei ki jingjia, ka Committee Balang jong ka Balang Presbyterian Mawkhar ka lah ïakren ïa u Rev. M. Pyngrope da kaba kyrpad ïa u ba un pynkohnguh ban soi ïa kata ka Bond wat la kane ka Bond long pyrshah ïa ka Riti Pynïaid Balang. Ka Committee Balang jong ka Balang Presbyterian Mawkhar lyngba ka shithi No. MPC/Pastoral Care/2025/31 dated 18 th September 2025 ka la bthah ïa une u pastor ban leit sign ïa ka Bond. Une u pastor u la pyntip sha ka Synod lyngba ka shithi kaba dated 24 th September 2025. Kat kum ka jingïathuh ktien jong une u pastor ba haba u leit ai ïa kane ka shithi pyntip sha ka Synod ba un sign ïa ka Bond, ki officer ka Synod kim treh ban pdiang ïa ka shithi. Balei mo haduh katne katne da ki nongpynïaid kam ha ka Synod ki leh?
5. Ka jingpyntip kumba la kdew haneng shaphang ka Special Session ka don ki kyntien “ka kam ba wan na ka Executive Committee kaba dei bad ka jingpynkhein bad jingbym kohnguh shuh jong uwei napdeng ki Pastor ïa ki Rai bad rukom treikam ka Synod.”
Halor jong kitei ki jingshisha, nga don ka jingsngewkhia ha kaba dei bad ki kam balang ha kaba ka nongrim kaba la dei ban bud pyrkhing, ka la nang synjor pynban. Syier eh ba kata ka Special Session ka ban sa long ha ka Balang Presbyterian Mawlai kan dei ka dorbar kaba ki dkhot ka EC kin pynbor kumba ki ju leh ha ki dorbar Synod ba kaei kaba ki la rai ka dei ka rai ka dorbar blei, bad ba ïa u khiew ja jong u Rev. M. Pyngrope kin kynjat bad ba ka longïing longsem jong u kan ïap thngan lane une u pastor un hap ban trud khyndew ne khar maw ria. Ka jingngeit Khristan ka hikai ba dei ban pynim wat ïa uba la jan ïap. Ka jingpule theology ruh ka hikai kumta. Kumno pat mo, ïa kata ka jingthmu babha ïa ka jingim, mynta la pynkylla baji lut? Hato kane ka Bond Agreement kam dei ka lynti treikam ka bor jingdum ban kdiah ïa ki thapniang ka Balang Khristan da kaba thlieh pynïap shuwa ïa ki nongsharai.
Kane ka Bond hato kan pyntieng kohtympan ban ym nud shuh ban ïeng ban kren ïa ka jingshisha?
Lada u Rev. M. Pyngrope u la pynkheiñ ïa ka Riti Pynïaid Balang ka Balang Presbyterian ha Ri India, nga kloi ban kubur bad ka rai jong ka Synod. Kata ruh lada ka jingmudui ka mih da ka kam lyngba ka Committee Balang jong ka Balang Presbyterian Mawkhar, kaba long ma ka, kaba la khot bad wer ïa une u pastor ban trei ïa ka kam sharai balang. Hynrei, ban shu kyrdem najrong sha tbian, ha ka rukom Pynïaid Balang Presbyterian ka long ka bym lah ban pdiang.
Lada ka long tang na ka daw ka Bond Agreement, nga kyrpad rit ha khmat ka burom jong phi, to pynkut noh ïa kane ka jingthmu, bad ai ba u Rev M. Pyngrope un trei laitluid ïa ka kam sharai balang ban kyntiew ïa ka burom U Blei.
Kyrmen kum ki shakri jong U Blei phin shim pyrkhat da ka mynsiem Khristan bashisha. To pynim wat pynïap!
Khublei.