Shillong, Naiwieng 25: Ka District Magistrate ka East Khasi Hills Kong RM Kurbah ka la pynjari da ka korphiw miet ha shilynter ka khappud ka East Khasi Hills District bad ka Bangladesh ban tehlakam ïa ka jingwan rung ki riewkieng atiar, ki runar, ki nongkhaïi tuh bad ki kam runar ha khappud.
Kane ka korphiw miet kan treikam hapoh u radius ba 1 km na zero line, ka ban sdang naduh ka por 8 baje mynmiet haduh ka por 6 baje mynstep. La pyntip ba kane ka jingpynjari kan treikam haduh arbnai kynthih.
Katkum ka kyrwoh la ong ba ka hukum, ka DM ka la ong ba namar ka jinglong jingman ba mynta ha ri Bangladesh, ka lah ban don ka jingwan rung tuh ki riew runar, ki dkhot jong ki seng kiengatiar , ki nongkhaïi tuh bad kino kino ki kam pyntriem ha ki shnong khappud ka India-Bangladesh.
Ka kyrwoh ka ong, “Naba katto katne ki khappud ka EKH ki dei kiba dang tlot ka jingpahara bad kiba jur haka jingwan rung tuh ki mynder ri, ki riew runar bad ki dkhot ki sengkiengatiar kiba lah ban ïalum bun briew ha khappud ha ka por mynmiet ban bteng ïa ki kam pyntriem”.
Ka hukum ka la khang ïa ka ïaid ki ïeng ki briew kiba don jingthmu ban jam ïa ka khappud ha kine ki kynta ba don ka korphiw, ban ïalum briew ba 5 ngut ne palat bad ban ïarah ïa ki tiar pynmynsaw ha khappud nalor ki kam beaiñ kynthup ka jingkhaïi ïa ki masi, kwai tympew, ki mar khaïi, ki biri, sikret, slasha bad kiwei kiwei.
Na ka liang ka District Magistrate ka la pyntip ba kane ka hukum kan treikam noh mardor bad kan neh 2 bnai naduh ba pynmih ïa kane ka hukum.
