Shillong, Naiwieng 25: U Myntri ka sorkar jylla bad u nongialam ka UDP u Bah Lahkmen Rymbui u la banjur halor ka jingdonkam ban kyntiew ïa ka pisa na ka bynta ban pyntreikam ïa ka MLA scheme da kaba ong ba kane ka jingmang pisa kaba mynta ka dang duna bha haba ïadei bad ki jingdonkam jong ki paidbah nongshong shnong.
“Ha ka jingshisha ïa ka MLA scheme la dei ban kyntiew bad kam dei ban shu neh sah kumjuh kaba dei tang T. 2.5 klur. Ngi kum ki MLA ngi hap ban ïarap ïa kiba bun ki jingdonkam jong ki paidbah,” ong u Bah Rymbui ha ka sngi baar haba kren sha ki lad pathai khubor.
U la ïada ïa ka jingpyntreikam ïa ka MLA scheme, da kaba kyntait ruh ïa ka jingdonkam ban pynlong ïa ka jingtohkit ba laitluid da kaba ong, “Kam dei ka kam kaba shimet ne ka pisa shimet jong uno uno u MLA, hynrei kadei na ka bynta ka bha ka miat jong ki paidbah. Namar kata baroh ki MLA ki sam bad ki pyntreikam ïa ki scheme ha la ki jong ki constituency.”
“Kum ma ngi ki don ki scheme, kaba naduh u snem 2023-2024, ki la don ki kam ba la pyndep bad ki dang don pat katto katne kiba dang ïaid. Don ka por ba slem ka jingaiti ïa ki jingmang ne estimate, ki don ruh ki por ba dei ban ïoh ka jingmynjur da executive engineer jong ka DRDA na ka daw ka jingpynkynriah ïa ki engineer ha kiba bun ki district, ki don pat ki executive engineer kiba wan ha ki por ki por,” ong u Bah Rymbui da kaba ai ruh ka jingïaroh ïa ki Deputy Commissioner ba kin lah ban pyndonkam ïa ki district Executive Engineer ha kaba ïadei bad ka post EE jong ka DRDA kaba dang thylli bad kaba donkam ïa ka jingmynjur kaba donkam kyrkieh.
“Namar kata lada phi ong ba ngi donkam tang T. 2.5 klur ka long ka bym dei namar ngi donkam bun ban ïarap ïa ki paidbah naba ka MLA skhim kam dei ka pisa jong u MLA shimet, hynrei ka dei ka pisa jong ki paidbah bad kaba long ka jingmyntoi jong ki paidbah,” ong u Bah Rymbui.
