Shillong, Naiwieng 25: Ka Sorkar Jylla ka la kyrpad ïa ka Sorkar Pdeng ba kan pynkylla ïa ki kyndon ka National Council for Teacher Education (NCTE) hadien ka jingïa pyrshah pyrshah ïa ka hukum ka Ïingkashari Supreme Court kaba pynlong kongsan ïa ka Teacher Eligibility Test (TET) ïa baroh ki nonghikai ba la don ha ka kam, kam pher ïa ka jingdon slem jong ki ha ka kam.
“Ngi la dep bthah ïa u Advocate General ba un file ïa ka review petition ne ka mudui ban shong bishar biang pyrshah ïa ka hukum ka SC bad kaba kham kongsan ka long ba ngi la pyrshang ban pynsngewthuh ïa ka Sorkar Pdeng ba kan pynkylla ïa ki kyndon ka NCTE khnang ba kan nym ktah ïa kaei kaba la dep shadien hynrei ba kan treikam tad hadien ka jingwan ka RTE,” ong u Myntri ka tnad Pule Puthi Bah Lahkmen Rymbui haba ïakren bad ki nongthoh khubor ha ka sngi Ba-ar.
Halor ka jingleit ki Nonghikai na Jylla ban ïasnohkti ha ka jingïakhih ha Delhi, u Bah Rymbui ula pynpaw ba um don jingtip satia ïa kane bad ba ka jingleit ïashimbynta ka dei kaba la rai da ki seng jong ki nonghikai hi.
Ula ban jur ïa ka jingpyrshang jong ka Sorkar ban ïada ïa ka jingshakri ki nonghikai bad ong, “Ka Sorkar kala pyrshang katba lah ban peit ba ki hukum ba la pynmih da kino kino ki bor kiba ktah ïa ka jingshakri jong ki nonghikai, kim dei ban long kiba treikam ïa ki snem bala leit noh hynrei ban long ïa ki snem ba shakhmat”. “Haba ong ïa kata, ïa mynta ka hukum jong ka Ïingkashari Supreme Court, kaba buh ba ka TET ka long ka kyndon ba longsan, kane kala ïeng,” ong u Bah Rymbui haba pynbna ba ka Sorkar kan hap ban ïaid katkum ka hukum ka Ïingkashari.
Haba kylli halor ka jingïaid ki kam ba ïadei bad ka jingmudui, u Bah Rymbui ula ong, “Ngi la dep ba rai bad u AG u dang pynkhreh ïa ka. Ki jingpynkhreh ïa ki kot ki sla ki la ïaid shakhmat”.
“U AG lehse ula dep ban mudui hynrei nga khlem pat kylli ïa u hynrei ïa ka rai hi la dep ban shim bad ki jingbthah lah dep ban ai ban mudui ïa ka hukum ka SC,” ula ong.
