La pynlong ïa ka jingïalang shuwa ka India International Science Festival (IISF) 2025

Shillong, Naiwieng 25: Ka India Meteorological Department (IMD), lyngba ka Meteorological Centre Shillong, ka la pynlong ïa ka Jingïalang shuwa ka India International Science Festival (IISF) 2025, kaba rakhe ïa ka mynsiem saiñdur thymmai ha ka liang ka saïan hapoh ka phang pdeng “Vigyan Se Samruddhi – For Aatmanirbhar Bharat.”
Kane ka jingïalang ka long ka jingsdang jong ki jingïatreilang ha ka ri baroh kawei kaba ïalam sha ka IISF 2025, kaba la buh ban long naduh ka 6 tarik haduh ka 9 tarik u Nohprah 2025 ha Panchkula ha Chandigarh, Haryana. Ka dei ka sienjam jong ka Tnad Earth Sciences (MoES) ryngkat ka jingïatreilang bad ki Tnad Science bapher bapher bad ki tnad treikam jong ka sorkar India bad ka Vijnana Bharati (VIBHA). Ka thmu ban pyni ïa ki jingjop jong ka India ha ka science, ban ai mynsiem ïa ki samla kiba saiñdur thymmai, bad ban pynkhlaiñ ïa ka jingthmu jong ka Viksit Bharat.
Haba ai jingkren ha kane ka jingïalang, u Thangjalal Lhouvum, Scientist & Head jong ka Meteorological Centre Shillong, u la kren shaphang ka jingkordor jong ka IISF na ka bynta samla wad bniah bad ka jingkyntiew ïa ki jingpule kiba kham shalor bad ka jingwad bniah kaba jylliew ka long kaba donkam. “La sdang ha u snem 2015 hapoh ka jingthmu jong u Myntri Rangbahduh, ka IISF ka long kum ka rynsan kaba ai ïa ki samla nongwad bniah ïa ki lad kiba kyrpang ban ïakren bad ki stad saïan ba pawnam bad wad bniah ïa ki bynta bapher bapher – naduh ka kyrdan quantum kaba rit tam haduh ki pud jong ka rocket science,” u la bynrap.
Ha kane ka prokram la kynthup ïa ka jingpyni ïa ka video ai jingtip jong ka IISF bad bud sa ka jingpyni kaba ïadei bad ka jingïakren. Ki khynnah skul bad ki nonghikai na ka Army Public School Shillong ruh ki la ïashim bynta ban ïoh ïa ka jingshai shaphang ki phang pdeng ba ïadei bad ka science bad ki prokram ki ban dang wan jong ka IISF.